சிக்னேச்சர் இன்டர்நேஷனல் - கெச்சாரா இணைந்து அமைத்த புதிய உணவு விநியோகம், திறன் மேம்பாட்டு மையம்

கோலாலம்பூர்: 

சிக்னேச்சர் இன்டர்நேஷனல் பெர்ஹாட் நிறுவனம், கெச்சாரா சூப் கிச்சன் அமைப்புடன் இணைந்து ஜாலான் இம்பியில் உள்ள மையத்தை இரட்டைச் செயல்பாடு கொண்ட புதிய வசதியாக மாற்றியமைத்துள்ளது.

வணிக நிறுவனங்களின் அனுபவம் சமூக நன்மைக்கு உதவ வேண்டும் என்ற நம்பிக்கையில், சிக்னேச்சர் நிறுவனம் தனது வடிவமைப்பு, மேலாண்மைத் திறன்களை இதற்காகப் பயன்படுத்தியுள்ளது.

'சிக்னேச்சர் கேர்ஸ்' என்ற கார்ப்பரேட் சமூகப் பொறுப்புத் திட்டத்தின் மூலம், கெச்சாராவின் எதிர்கால திறன் மேம்பாட்டுத் தேவைகளுக்கு ஏற்ப இம் மையம் மறுவடிவமைப்பு செய்யப்பட்டுள்ளது.

இரண்டு தசாப்தங்களாக உணவளித்து வந்த இம் மையத்திற்கு, உணவு விநியோகத்தோடு சேர்த்து பயனாளிகளுக்கு சுயசார்பு பயிற்சிகள் அளிக்கும் புதிய வசதி தேவைப்பட்டது.

வீட்டு வசதித் தீர்வுகளில் 30 ஆண்டுகளுக்கும் மேலான அனுபவம் கொண்ட சிக்னேச்சர் நிறுவனம், தன்னார்வலர்கள், பயனாளிகளுக்கு ஏற்றவாறு இம் மையத்தின் பணிச்சூழலை முழுமையாக மேம்படுத்தியுள்ளது.

இந்த மையம் ஒரே நேரத்தில் தினசரி உணவு விநியோக மையமாகவும், பயனாளிகளுக்குச் சமையல், பேக்கிங் போன்ற தொழிற்பயிற்சிகளை வழங்கும் திறன் மேம்பாட்டு மையமாகவும் செயல்படுகிறது.

- மவித்ரன்