4 மாதங்களில் 1.127 டிரில்லியன் ரிங்கிட் வர்த்தகம்: உலக பொருளாதார மேடையில் மலேசியாவின் சக்திவாய்ந்த எழுச்சி

கோலாலம்பூர்:

உலக பொருளாதார அலைச்சல்களையும், மேற்கு ஆசிய புவிசார் அரசியல் பதற்றங்களையும் தாண்டி, மலேசியா 2026ஆம் ஆண்டின் முதல் நான்கு மாதங்களிலேயே வர்த்தக வரலாற்றில் புதிய உச்சியை தொட்டுள்ளது.

மலேசிய வெளி வர்த்தக மேம்பாட்டுக் கழகமான மாட்ரேட் (MATRADE) வெளியிட்ட அதிரடி அறிக்கையின்படி, ஜனவரி முதல் ஏப்ரல் 2026 வரை நாட்டின் மொத்த வர்த்தகம் 15.3 விழுக்காடு உயர்ந்து 1.127 டிரில்லியன் ரிங்கிட் என்ற வரலாற்றுச் சாதனையைப் பதிவு செய்துள்ளது.

செயற்கை நுண்ணறிவு (ஏஐ), கிளவுட் கணினி தொழில்நுட்பம், தரவு மையங்களின் வெடித்தளராத வளர்ச்சி காரணமாக, மலேசியாவின் மின்சார, மின்னணு (E&E) ஏற்றுமதிகள் அபாரமாக உயர்ந்துள்ளன.

ஏஐ சார்ந்த தயாரிப்புகளின் ஏற்றுமதி மட்டும் 42.9% உயர்ந்து 319.05 பில்லியனை எட்டியுள்ளது. இது நாட்டின் மொத்த ஏற்றுமதியில் பாதிக்கும் மேற்பட்ட பங்கைக் கைப்பற்றியுள்ளது.

இந்த முன்னேற்றம், உலகளாவிய ஏஐ விநியோகச் சங்கிலியில் மலேசியா தற்போது தவிர்க்க முடியாத சக்தியாக மாறிவிட்டதைக் காட்டுவதாக பொருளாதார வட்டாரங்கள் பாராட்டுகின்றன.

மலேசியாவின் ஏற்றுமதி மதிப்பு 609.31 பில்லியனாக உயர்ந்துள்ள நிலையில், வர்த்தக உபரி 99.1% பாய்ச்சலுடன் 91.92 பில்லியன் ரிங்கிட்டைத் தொட்டுள்ளது.
ஏப்ரல் மாதம் மட்டும் மாதாந்திர ஏற்றுமதி 182.74 பில்லியன் rரிங்கிட் வரலாற்று உச்சத்தை எட்டியதோடு, மாதாந்திர வர்த்தக உபரி 460.5% உயர்ந்து 28.75 பில்லியனாக வெடித்துள்ளது.

அமெரிக்கா, தைவான், சீனா, ஹாங்காங், ஐரோப்பிய ஒன்றியம், ஆசியான் நாடுகளுக்கு மலேசிய ஏற்றுமதி கணிசமாக உயர்ந்துள்ளது.

குறிப்பாக ஆப்பிரிக்கா, கிழக்கு ஐரோப்பிய நாடுகளில் மலேசியாவின் வர்த்தக விரிவாக்கம் புதிய பரிமாணத்தை எட்டியுள்ளது. காங்கோ, சூடான், ஜிம்பாப்வே, பல்கேரியா, எத்தியோப்பியா போன்ற நாடுகளில் மலேசிய தயாரிப்புகளுக்கான தேவை அதிவேகமாக உயர்ந்துள்ளது.

மாட்ரேட் தலைமை நிர்வாக அதிகாரி அபு பக்கார் யூசோஃப், “மலேசிய தொழில்கள் உலக தொழில்நுட்ப விநியோகச் சங்கிலியின் மையமாக மாறிக் கொண்டிருக்கின்றன. பாரம்பரிய சந்தைகளைத் தாண்டி, புதிய பொருளாதார எல்லைகளை மலேசிய ஏற்றுமதியாளர்கள் தைரியமாக கைப்பற்றுகிறார்கள்,” என்றார்.

13வது மலேசியத் திட்டத்தின் கீழ் செமிகண்டக்டர், டிஜிட்டல் பொருளாதாரம், உயர் மதிப்புள்ள தொழில்கள் மீது கவனம் செலுத்தப்பட்டிருப்பது, நாட்டின் பொருளாதாரத்தை உலக அரங்கில் புதிய உயரத்திற்கு கொண்டு சென்றுள்ளதாக நிபுணர்கள் மதிப்பிடுகின்றனர்.

உலக பொருளாதார நிச்சயமற்ற சூழலிலும், மலேசியா தனது வர்த்தக சக்தி, தொழில்நுட்ப முன்னேற்றம், உலகளாவிய சந்தை விரிவாக்கத்தின் மூலம் ஆசியாவின் எழுச்சி சக்தியாக மாறி வருவது இந்த சாதனையின் மூலம் தெளிவாகியுள்ளது.

- சங்கீர்த்தனா