மலேசியாவின் பொருளாதார வளர்ச்சி குறித்த எதிர்பார்ப்பு: நாணயச் சந்தையில் ரிங்கிட் தொடர்ந்து வலுவடைந்து வருகிறது

கோலாலம்பூர்: 

வெள்ளிக்கிழமை மலேசியாவின் முதல் காலாண்டு (1Q) மொத்த உள்நாட்டு உற்பத்தி (ஜிடிபி) அறிவிப்பிற்கு முன்னதாக, அமெரிக்க டாலர் உள்ளிட்ட முக்கிய நாணயங்களின் கூடைக்கு எதிராக ரிங்கிட் இன்று அதிகமாகத் திறந்துள்ளது.

காலை 8 மணிக்கு, உள்ளூர் நாணயம், செவ்வாய்க்கிழமை மூடலின் போது இருந்த 3.9320/9360 என்பதிலிருந்து, அமெரிக்க டாலருக்கு எதிராக 3.9315/9370 ஆக உயர்ந்தது.

உலகளாவிய நிச்சயமற்ற தன்மைகளுக்கு மத்தியிலும் மலேசியாவின் பொருளாதாரம்  2026 ஆம் ஆண்டின் முதல் காலாண்டில் 5.3 சதவீதம் வளரும் என்று மலேசிய புள்ளியியல் துறை கணித்துள்ளது. 

இதற்கிடையில், அமெரிக்க டாலர் குறியீடு (DXY) 0.36 சதவீதம் உயர்ந்து 98.305 புள்ளிகளாக இருந்ததாக மலேசிய முவமாலாட் வங்கியின் தலைமைப் பொருளாதார நிபுணர் டாக்டர் முஹம்மத் அப்ஸானிசம் அப்துல் ரஷித் தெரிவித்தார்.

அமெரிக்க பெடரல் ரிசர்வ், எதிர்வரும் காலத்தில் தனது கட்டுப்பாட்டு பணவியல் கொள்கை நிலைப்பாட்டைப் பராமரிக்கும் என்ற எதிர்பார்ப்புகளுக்கு மத்தியில் இது உள்ளதாக அவர் கூறினார்.

"எப்படியிருந்தாலும், ரிங்கிட் ஒப்பீட்டளவில் நிலையானதாகத் தெரிகிறது" என்று அவர் பெர்னாமா செய்தி நிறுவனத்திடம் தெரிவித்தார்.

திறப்பின் போது, ரிங்கிட், செவ்வாய்க்கிழமை மூடலின் போது இருந்த 2.4952/4979 என்பதிலிருந்து, ஜப்பானிய யென்னுக்கு எதிராக 2.4933/4970 ஆக உயர்ந்தது. செவ்வாய்க்கிழமை மூடலின் போது இருந்த 5.3231/3286 என்பதிலிருந்து, பிரிட்டிஷ் பவுண்டுக்கு எதிராக 5.3213/3287 ஆக வலுப்பெற்றது. மேலும், 4.6189/6236 என்பதிலிருந்து, யூரோவுக்கு எதிராக 4.6136/6201 ஆக உயர்ந்தது.

பிராந்திய நாணயங்களுக்கு எதிராக, ரிங்கிட், இந்தோனேசிய ரூபியாவுக்கு எதிராக 224.3/224.0 என்பதிலிருந்து 224.2/224.7 ஆக சற்று உயர்ந்தது. மேலும், பிலிப்பைன்ஸ் பெசோவுக்கு எதிராக 6.39/6.41 என மாறாமல் இருந்தது.

ரிங்கிட், செவ்வாய்க்கிழமை மூடலின் போது இருந்த 3.0888/0922 என்பதிலிருந்து, சிங்கப்பூர் டாலருக்கு எதிராக 3.0910/0956 ஆகத் தளர்ந்தது. மேலும், செவ்வாய்க்கிழமை மூடலின் போது இருந்த 12.1276/1455 என்பதிலிருந்து, தாய் பாட்டுக்கு எதிராக 12.1421/1663 ஆகச் சரிந்தது.

இதற்கிடையில், இன்றைய நிலவரப்படி இந்திய ரூபாய் ஒரு ரிங்கிட்டிற்கு 24.34 காசாக உயரந்துள்ளது. டாலருக்கு எதிராக இந்திய ரூபாய் 95.64 காசுக்கு விற்பனை செய்யப்படுகிறது.

- சங்கீர்த்தனா