ஆஸ்திரேலிய பிரதமர் இன்று முதல் வெள்ளிக்கிழமை வரை மலேசியாவில் அதிகாரப்பூர்வ பயணம் மேற்கொள்கிறார்

கோலாலம்பூர்: 

ஆஸ்திரேலிய பிரதமர் அந்தோணி அல்பானீஸ், இன்று முதல் வெள்ளிக்கிழமை வரை மலேசியாவில் அதிகாரப்பூர்வ பயணம் மேற்கொள்ளவுள்ளார்.

அல்பானீஸுக்கு நாளை கோம்ப்ளக்ஸ் பெர்டானா புத்ராவில் உத்தியோகபூர்வ வரவேற்பு அளிக்கப்படும். அதனைத் தொடர்ந்து, பிரதமர் டத்தோஸ்ரீ அன்வர் இப்ராஹிமுடன் அவர் வரையறுக்கப்பட்ட கூட்டத்தை நடத்த திட்டமிடப்பட்டுள்ளது.

இரு தரப்பு விவாதங்களுக்கு மேலதிகமாக, மேற்கு ஆசியாவில் நிலவும் மோதலின் முன்னேற்றங்கள், உலகளாவிய எரிசக்தி நெருக்கடியில் அதன் தாக்கம், இரு நாடுகளுக்கும் நேரடி தாக்கங்கள் ஆகியவற்றையும் இரு பிரதமர்களும் விவாதிப்பார்கள் என்று விஸ்மா புத்ரா ஒரு அறிக்கையில் தெரிவித்துள்ளது.

"இது குறித்து, பதற்றங்களைக் குறைப்பதற்கான இராஜதந்திர முயற்சிகளை இரு தலைவர்களும் தீவிரப்படுத்துவார்கள் என்று எதிர்பார்க்கப்படுகிறது.

அதே நேரத்தில், சர்வதேச வர்த்தகப் பாதைகளின் தொடர்ச்சியையும், மக்களின் நல்வாழ்வுக்கு முக்கியமான எரிசக்தி விநியோகச் சங்கிலியின் நிலைத்தன்மையையும் உறுதி செய்வார்கள்" என்று அந்த அறிக்கை தெரிவித்துள்ளது.

தொடர்ந்து, புவிசார் அரசியல் இடையூறுகளின் போது, திறந்த, நம்பிக்கையான எரிசக்தி வர்த்தகத்தைப் பராமரிப்பதற்கான இரு நாடுகளின் அர்ப்பணிப்பை குறித்த கூட்டு அறிக்கை உறுதிப்படுத்தும் என்று எதிர்பார்க்கப்படுகிறது.

கூடுதலாக, மலேசியாவுக்கும் ஆஸ்திரேலியாவுக்கும் இடையிலான ஹலால் சிவப்பு இறைச்சி மூலோபாய கூட்டாண்மை (SHRP) குறித்த புரிந்துணர்வு ஒப்பந்தத்தின் (MoU) பரிமாற்றமும் திட்டமிடப்பட்டுள்ளது. இது, மலேசிய இஸ்லாமிய முன்னேற்றத் துறைக்கும் (JAKIM), ஆஸ்திரேலியாவின் வேளாண்மை, மீன்வளம், வனவியல் துறைக்கும் (DAFF) இடையிலான ஒத்துழைப்பை உள்ளடக்கியது. ஆய்வுச் செயல்முறையை ஒழுங்குபடுத்துவதையும், ஹலால் இறைச்சிக்கான அணுகலை அதிகரிப்பதையும் இது நோக்கமாகக் கொண்டுள்ளது.

ஆஸ்திரேலியா மலேசியாவிற்கு ஒரு முக்கியமான வர்த்தக பங்காளியாக தொடர்வதாக அந்த அறிக்கை மேலும் தெரிவித்துள்ளது.

"2025 ஆம் ஆண்டில், இரு நாடுகளும் ஒன்றுக்கொன்று 12வது பெரிய வர்த்தக பங்காளிகளாக இருந்தன.

2025 ஆம் ஆண்டில் இரு தரப்பு வர்த்தகத்தின் மொத்த மதிப்பு 78.63 பில்லியனாக இருந்தது. ஏற்றுமதி மதிப்பு 48.64 பில்லியன், இறக்குமதி மதிப்பு 29.9 பில்லியன் ஆகும்" என்று அந்த அறிக்கை மேலும் தெரிவித்துள்ளது.

-சங்கீர்த்தனா