FBI பயிற்சித் திட்டத்தில் கலந்துகொள்ளும் முதல் ஏ.கே.பி.எஸ் பெண் அதிகாரி 

கோலாலம்பூர்: 

கோலாலம்பூர் சர்வதேச விமான நிலையத்தின் (கே.எல்.ஐ.ஏ.) முனையம் 1 இன் எல்லைப் பாதுகாப்பு கட்டுப்பாட்டு நிறுவனத்தின் (ஏ.கே.பி.எஸ்) தலைவர் மேரி அஜெங், அமெரிக்காவில் உள்ள கூட்டாட்சி புலனாய்வுப் பணியகத்தின் (FBI) பயிற்சித் திட்டத்தில் மலேசியாவைப் பிரதிநிதித்துவப்படுத்துவதற்காகத் தேர்ந்தெடுக்கப்பட்டுள்ளார்.

45 வயதுடைய மேரி, FBI தேசிய அக்காடமியில் பயிற்சியை மேற்கொள்ளும் ஏ.கே.பி.எஸ்-இன் முதல் பெண் அதிகாரி ஆவார். இன்று முதல் ஜூன் 18 வரை வர்ஜீனியாவின் குவாண்டிகோவில் நடைபெறும் இந்தப் பயிற்சியில், அமெரிக்கா உட்பட 26 நாடுகளைச் சேர்ந்த 249 சட்ட அமலாக்க அதிகாரிகளுடன் அவர் கலந்துகொள்கிறார்.

திட்டமிடலுடன் ஒத்துப்போகும் வகையில் பணிகளைச் செயல்படுத்தும் சூழலில், தனது அதிகாரிகளைச் சர்வதேச செயல்பாட்டுத் தரங்களுக்கு வெளிப்படுத்தும் முயற்சிகளில் ஒன்றாக, அந்தத் திட்டத்தில் அவர் பங்கேற்பதை ஏ.கே.பி.எஸ் ஒரு அறிக்கையில் தெரிவித்துள்ளது.

FBI தேசிய அகாடமியின் பயிற்சித் திட்டத்தில் ஏ.கே.பி.எஸ்-இன் பங்கேற்பு, ஏ.கே.பி.எஸ் அதிகாரிகளின் தொழில்முறைத் திறனுக்கான அங்கீகாரத்தைப் பிரதிபலிப்பது மட்டுமல்லாமல், சர்வதேச தரங்களின் மூலம் நாட்டின் நுழைவாயில் பாதுகாப்பை வலுப்படுத்துவதில் மலேசியாவின் தொடர்ச்சியான அர்ப்பணிப்பையும் காட்டுகிறது என்று அது கூறியது.

"இந்தோனேசியா, தாய்லாந்து, கம்போடியா, தைவான் ஆகிய நாடுகளைச் சேர்ந்தவர்களைத் தவிர, ஆசியாவைச் சேர்ந்த ஐந்து நாடுகளின் சட்ட அமலாக்க அதிகாரிகளில் மேரி அஜெங்கும் ஒருவராவார்.

"நவீன தடயவியல் அணுகுமுறைகள், தொழில்நுட்ப அடிப்படையிலான போலியைக் கண்டறியும் நுட்பங்கள், சர்வதேச மட்டத்தில் பயன்படுத்தப்படும் பயங்கரவாத எதிர்ப்புத் தடுப்பு, பதிலடி உத்திகள் குறித்து அவர்களுக்கு வெளிப்பாடு வழங்கப்படும்.

"அதிகரித்து வரும் அதிநவீன அச்சுறுத்தல்களுக்கு ஏற்ப ஏ.கே.பி.எஸ்-இன் திறனை வலுப்படுத்துவதில் இந்த வெளிப்பாடு மிகவும் முக்கியமானதாகும்.

"இந்தத் திட்டம் மூலோபாய மேலாண்மை, செயல்பாட்டுத் தலைமை முதல் உயர் தொழில்நுட்ப விசாரணை, புலனாய்வு நுட்பங்கள் வரையிலான பயிற்சிக் களத்தை உள்ளடக்கியதாக, விரிவான, உயர் தீவிரத்தன்மையுடன் வடிவமைக்கப்பட்டுள்ளது" என்று ஏ.கே.பி.எஸ் தெரிவித்தது.

உலகளாவிய பாதுகாப்பு நிலப்பரப்பு மிகவும் சிக்கலானதாகவும், மாறுபட்டதாகவும் மாறி வரும் சூழலில், நாட்டின் நுழைவாயில்களுக்கு எதிரான அச்சுறுத்தல்கள் இனி வழக்கமான தன்மையைக் கொண்டிருக்கவில்லை என்று ஏ.கே.பி.எஸ் கூறியது.

தற்போது உள்ள அபாயங்கள், டிஜிட்டல் ஆவணப் போலி, சைபர் கிரைம், மனிதக் கடத்தல், எல்லை தாண்டிய பயங்கரவாத அச்சுறுத்தல்கள் உள்ளிட்ட பரந்த பரிமாணங்களை உள்ளடக்கியதாக உள்ளன என்று அது தெரிவித்தது.

"மேலும் முக்கியமாக, இந்தத் திட்டம் வகுப்பறையில் முறையான கற்றலைத் தாண்டி, பல்வேறு நாடுகளைச் சேர்ந்த சட்ட அமலாக்க அதிகாரிகளுடன் மூலோபாய தொடர்பு, அனுபவப் பரிமாற்றத்திற்கான இடத்தைத் திறக்கிறது. இது ஒரு உலகளாவிய தொழில்முறை வலையமைப்பையும் உருவாக்குகிறது" என்று ஏ.கே.பி.எஸ் கூறியது.

இந்தப் பயிற்சியில் ஏ.கே.பி.எஸ் அதிகாரி ஒருவரின் பங்கேற்பு, நாட்டின் சட்ட அமலாக்க அதிகாரிகளுக்கு நிச்சயமாக நன்மைகளை வழங்கும் என்றும், மேலும் அது சம்பந்தப்பட்ட சட்ட அமலாக்க நிறுவனத்திற்கு ஒரு மூலோபாய சொத்தாக மாறும் என்றும் ஏ.கே.பி.எஸ் தெரிவித்தது.

இந்தப் பயிற்சித் திட்டத்தை மேற்கொள்ளும் ஒவ்வொரு அதிகாரியும் உள் குறிப்பு நிபுணராகப் பங்கு வகிப்பார் என்றும், நிறுவனத்தின் விசாரணைத் திறனை வலுப்படுத்துவார் என்றும், நிலையான இயக்க நடைமுறைகள், நாட்டின் நுழைவாயில் பாதுகாப்புக் கொள்கைகளை மேம்படுத்துவதில் கணிசமாகப் பங்களிப்பார் என்றும் ஏ.கே.பி.எஸ் கூறியது.

"FBI தேசிய அகாடமியின் கூட்டுப் பயிற்சித் திட்டத்திற்கு கூடுதலாக, ஏ.கே.பி.எஸ் தொடர்ந்து தனது அதிகாரிகளை லண்டன், வியட்நாம், ஆஸ்திரேலியா, இலங்கை ஆகிய நாடுகளில் பயிற்சிக்கு அனுப்பி வருகிறது. இது, செயல்பாட்டு அம்சங்களில் மிகவும் தொழில்முறை, தகவமைப்பு, உயர் தாக்கம் கொண்ட தரங்களைப் பண்பாடாக்கும் சூழலில், சிறந்த வேலை நடைமுறைகளுக்கான தொடர்ச்சியான வெளிப்பாட்டை உறுதி செய்வதாகும்.

"இது, ஏ.கே.பி.எஸ்-இன் தலைமை இயக்குநர் டத்தோஸ்ரீ முஹம்மத் ஷுஹைலி முஹம்மத் ஜைனின் விருப்பத்துடனும் ஒத்துப்போகிறது. மற்ற வளர்ந்த நாடுகளைப் போலவே சர்வதேச எஸ்.ஓ.பி-களின்படி தனது நிறுவனத்தை வழிநடத்தும் தனது அதிகாரிகளைக் காண அவர் விரும்புகிறார்" என்று ஏ.கே.பி.எஸ் கூறியது.

2006 ஆம் ஆண்டில் இந்தப் பயிற்சியில் கலந்துகொண்ட முதல் முன்னாள் மாணவர் முஹம்மத் ஷுஹைலி ஆவார். அவரைத் தொடர்ந்து, கிள்ளான் துறைமுக ஏ.கே.பி.எஸ் தளபதி டத்தோ நிக் எஸானி முஹம்மத் ஃபைசல் (2018), ஏ.கே.பி.எஸ் ஒருமைப்பாட்டுப் பிரிவுத் தலைவர் அஸ்ருல் ரிட்சுவான் அஹ்மத் ருஸ்தாமி (2023) ஆகியோர் கலந்துகொண்டுள்ளனர்.

-சங்கீர்த்தனா