மலேசியப் பொருளாதாரம் 4.6% வளர்ச்சி காணும்: ஆம்ரோ

கோலாலம்பூர்: 

மேற்கு ஆசியாவில் நிலவும் மோதல், அமெரிக்காவின் கட்டணக் கொள்கைகளின் நிச்சயமற்ற தன்மை போன்ற சவால்களுக்கு மத்தியிலும், மலேசியாவின் பொருளாதாரம் இந்த ஆண்டு 4.6 சதவீதம் வளரும் என எதிர்பார்க்கப்படுகிறது.

ASEAN+3 மேக்ரோ பொருளாதார ஆராய்ச்சி அலுவலகத்தின் (ஆம்ரோ) அறிக்கையின்படி, நாட்டின் பணவீக்கமும் 2027 ஆம் ஆண்டு வரை 2.0 சதவீதத்தில் நிலையாக இருக்கும் என எதிர்பார்க்கப்படுகிறது.

மலேசியாவின் பொருளாதாரச் செயல்திறன் தொடர்ந்து வலுப்பெறும் என்றும், அடுத்த ஆண்டு 4.7 சதவீத வளர்ச்சி இருக்கும் என்றும் ஆம்ரோ கூறியுள்ளது.

இதற்கிடையில், சீனா, ஜப்பான், தென் கொரியாவை உள்ளடக்கிய ஆசியான் பிளஸ் த்ரீ பொருளாதாரமானது, 2027 ஆம் ஆண்டு வரை 4.0 சதவீதம் வளரும் என எதிர்பார்க்கப்படுகிறது.

பலவீனமான வெளிப்புற தேவை, அமெரிக்காவின் உலகளாவிய கட்டணங்களைச் செயல்படுத்துவதே இந்த மெதுவான விரிவாக்கத்திற்கான எதிர்பார்ப்புக்குக் காரணமாகும்.

இதைச் சமாளிக்கும் வகையில், தொழில்நுட்ப முதலீடுகள் செமிகண்டக்டர்கள், மின்னணுவியல் பொருட்களுக்கான ஏற்றுமதித் தேவையைத் தூண்டும் என எதிர்பார்க்கப்படுகிறது.

வலுவான தொழிலாளர் சந்தை நிலைமைகள் காரணமாக, உள்நாட்டுத் தேவையும் வலுவாகவே இருக்கும் என கணிக்கப்பட்டுள்ளது.

-சங்கீர்த்தனா