தனது சகாக்களைக் காயப்படுத்திய குற்றச்சாட்டை மறுத்த இராணுவ வீரர்

பெந்தோங்: 

கடந்த மாதம் மற்ற இராணுவ வீரர்களைக் காயப்படுத்தியதாகச் சாட்டப்பட்ட ஏழு குற்றச்சாட்டுகளுக்கு, கோப்ரல் பதவியிலுள்ள ஒரு இராணுவ வீரர் இன்று இங்குள்ள மாஜிஸ்திரேட் நீதிமன்றத்தில் குற்றமற்றவர் என மறுத்துள்ளார்.

37 வயதுடைய சுக்ரி தாசு, மாஜிஸ்திரேட் முஹம்மத் ஐமான் அஸாஹன் முன்னிலையில் இந்த மறுப்பைத் தெரிவித்தார்.

முதல் குற்றச்சாட்டில், மார்ச் 30, 2026 அன்று காலை 8.30 மணியளவில், பெந்தோங்கிலுள்ள 25வது பட்டாலியன் ராயல் மலாய் படைப்பிரிவு முகாமின் 'C' கம்பெனியின் ஆயுதக் கிடங்கில் 24 வயதுடைய முஹம்மத் அமீருல் ராசிக் ரோசபிண்டிக்கு கடுமையான காயத்தை ஏற்படுத்தியதாகக் குற்றஞ்சாட்டப்பட்டுள்ளார். 

தண்டனைச் சட்டத்தின் பிரிவு 325-ன் கீழ் அவர் மீது குற்றம் சாட்டப்பட்டுள்ளது. குற்றம் நிரூபிக்கப்பட்டால், அதிகபட்சம் ஏழு ஆண்டுகள் சிறைத்தண்டனையும் அபராதம் விதிக்கப்படலாம்.

துணை வழக்குத் தொடரும் அதிகாரி முஹம்மத் ஜம்ஹரிர் முஹம்மத் ஜுஹித், RM10,000 ஜாமீனுடன் விசாரணை முடியும் வரை குற்றஞ்சாட்டப்பட்டவர் பாதிக்கப்பட்டவரை அணுகவோ அல்லது தொடர்புகொள்ளவோ கூடாது என்ற கூடுதல் நிபந்தனையையும் அவர் முன்மொழிந்தார்.

தனது வாடிக்கையாளர் ஒரு கிடங்குக் காவலாளியாகப் பணிபுரிவதாகவும், அவர் RM1,800 நிகர மாத வருமானத்தைப் பெறுவதாகவும் கூறி, குறைந்த ஜாமீன் தொகையைப் பாதுகாப்பு வழக்கறிஞர் முஹம்மத் ஹாபிஸ் பஹாருடின் கோரினார்.

முதல் குற்றச்சாட்டிற்கு RM7,000 ஜாமீனை நீதிமன்றம் நிர்ணயித்தது. மேலும், அந்தக் கூடுதல் நிபந்தனையும் விதிக்கப்பட்டது. ஆவணங்களைச் சமர்ப்பிப்பதற்காக மே 18 ஆம் தேதியும் நிர்ணயிக்கப்பட்டது.

மற்ற குற்றச்சாட்டுகளில், சுக்ரி மேலும் ஆறு பேரைக் காயப்படுத்தியதாகக் குற்றஞ்சாட்டப்பட்டுள்ளது. அவர்கள், முஹம்மத் அதிகில்லா தௌகெக் ரஷிடி (21), முஹம்மத் சியாகிரின் யாகூப் (20), முஹம்மத் அஸ்மான் ஷா இஸ்மாயில் (22), நிக் அமிர் ஜாக்வான் நிக் அஸ்ரிஸால் (19),முஹம்மத் இர்ஃபான் ஐமான் முஹம்மத் தாஜுதீன் (19), முஹம்மத் தனியால் அஸ்ராப் அசிஸான் (22) ஆவர். இந்தச் சம்பவங்கள் அனைத்தும் அதே நாளில் இரவு 8.30 மணியளவில் அதே இடத்தில் நடந்ததாகக் கூறப்படுகிறது.

இந்தக் குற்றச்சாட்டுகள் அனைத்தும் தண்டனைச் சட்டத்தின் பிரிவு 323-ன் கீழ் விசாரிக்கப்படுகின்றன. குற்றம் நிரூபிக்கப்பட்டால், அதிகபட்சம் ஒரு வருடம் சிறைத்தண்டனை, அல்லது RM2,000 வரை அபராதம், அல்லது இரண்டும் விதிக்கப்படலாம்.

ஒவ்வொரு குற்றச்சாட்டுக்கும் RM4,000 ஜாமீனை வழக்குத் தொடர்பு தரப்பு முன்மொழிந்தது. பாதுகாப்புத் தரப்பு RM1,800 முதல் RM2,000 வரை ஜாமீன் கோரியது. ஒவ்வொரு குற்றச்சாட்டுக்கும் RM2,000 ஜாமீனை நீதிமன்றம் நிர்ணயித்தது. மேலும், விசாரணை முடியும் வரை குற்றஞ்சாட்டப்பட்டவர் அனைத்துப் பாதிக்கப்பட்டவர்களையும் அணுகவோ அல்லது தொடர்புகொள்ளவோ கூடாது என்றும் உத்தரவிட்டது.

முன்னதாக, இங்குள்ள ஒரு இராணுவ முகாமில் ஏழு வீரர்கள் மீதான தாக்குதல் சம்பவம் தொடர்பாக விசாரணைக்கு உதவும் வகையில், மார்ச் 31 ஆம் தேதி ஒரு இராணுவ வீரரைப் போலிஸார் கைது செய்தனர். இந்தத் தாக்குதலில் ஒருவர் கடுமமாகக் காயமடைந்ததாகத் தெரிகிறது.

-சங்கீர்த்தனா