30 ரிங்கிட் முதலீட்டில் RM40 மில்லியன் சொத்து சேர்த்த முன்னாள் ஹாக்கி கேப்டன்

கோலாலம்பூர்:

வெறும் 30 ரிங்கிட் முதலீட்டில் சிற்றுண்டி விற்பனை செய்யத் தொடங்கிய தேசிய இளைஞர் ஹாக்கி அணியின் முன்னாள் கேப்டன் முஹம்மத் ஹசிக் சம்சுல், இன்று RM40 மில்லியன் ரிங்கிட் மதிப்பிலான வணிக சாம்ராஜ்யத்திற்கு அதிபதியாக உருவெடுத்துள்ளார். 

விளையாட்டுத் துறையில் 2013-ஆம் ஆண்டு உலகக்கோப்பை, 2014-ஆம் ஆண்டு காமன்வெல்த் போட்டிகளில் மலேசியாவைப் பிரதிநிதித்துவப்படுத்திய இவர், தற்போது 'பாட்டல் கேரேஜ் எம்பயர்' (Bottol Garage Empire) எனும் மோட்டார் வாகன உதிரிபாகங்கள், பழுதுபார்க்கும் வணிகத்தில் பெரும் வெற்றி கண்டுள்ளார்.

தனது பள்ளிப் பருவத்திலிருந்தே சிறு சிறு வணிகங்களில் ஈடுபட்டு வந்த ஹசிக், சலூன் கடை, பழைய ஆடை விற்பனை எனப் பல முயற்சிகளில் தோல்விகளைச் சந்தித்தார்.

இருப்பினும், விடாமுயற்சியுடன் 2020-ஆம் ஆண்டு கோவிட் பெருந்தொற்று காலத்தில் தொடங்கிய மோட்டார் வாகன வணிகம் அவருக்குப் பெரும் திருப்புமுனையாக அமைந்தது. 

இன்று நாடு முழுவதும் 9 கிளைகளுடன் இயங்கும் இவரது நிறுவனத்தில் 120 ஊழியர்கள் பணிபுரிகின்றனர். மாதம் சராசரியாக RM3 மில்லியன் ரிங்கிட் வருவாய் ஈட்டும் இவரது வணிகத்தின் தற்போதைய மதிப்பு RM40 மில்லியன் ரிங்கிட் ஆகும்.

தனது 32 வயதிலேயே இத்தகைய சாதனையைப் படைத்துள்ள ஹசிக், விளையாட்டைப் போலவே வணிகத்திலும் தீவிர கவனம் செலுத்துவதே தனது வெற்றியின் ரகசியம் என்கிறார். புதிய கிளைகளைத் தொடங்குவதை விட, தற்போதுள்ள கிளைகளில் வாடிக்கையாளர்களுக்குச் சிறந்த சேவையை வழங்குவதே தனது எதிர்காலத் திட்டம் என அவர் குறிப்பிட்டுள்ளார். மற்றவர்களுக்கு வேலைவாய்ப்பை வழங்குவதை இறைவனின் அருளாகக் கருதும் இவர், ஒரு தொழிலதிபராகத் தோல்வியடைந்தால் அதற்குத் தாமே பொறுப்பேற்க வேண்டும் என்பதில் உறுதியாக இருக்கிறார்.

தங்களின் ஆர்வம் எது என்பதை முன்கூட்டியே கண்டறிந்து, அதற்கேற்ப பயிற்சிகளை மேற்கொள்வது பிற்கால வாழ்க்கைக்குப் பெரும் உதவியாக இருக்கும் என அவர் தனது அனுபவத்தின் மூலம் அறிவுறுத்தியுள்ளார்.

-கிரித்திக்கா