சிறுவர்கள் வாழ்க்கையில் விளையாடிய மெட்டா: 375 மில்லியன் டாலர் அபராதம் விதித்த நீதிமன்றம்

வாஷிங்டன்: 

குழந்தை பாலியல் சீர்கேடு உள்ளிட்ட இணைய ஆபத்துக்களிலிருந்து குழந்தைகளைப் பாதுகாக்க தவறியதற்காக சமூக ஊடக நிறுவனமான மெட்டாவுக்கு நியூ மெக்ஸிகோவில் உள்ள சாண்டா ஃபே நீதிமன்றம் நேற்று 375 மில்லியன் டாலர் (RM 1.76 பில்லியன்) செலுத்த உத்தரவிட்டது.

குழந்தைகளைப் பல்வேறு அபாயங்களுக்கு ஆளாகுவதன் மூலம் அவர்களை ஆபத்தில் ஆழ்த்துவதற்கு மெட்டா தான் காரணம் என்று நீதிபதிகள் குழு கண்டறிந்ததை அடுத்து இந்த முடிவு எடுக்கப்பட்டது.

இந்தத் தீர்ப்பில், குழந்தைகளுக்கான அதன் தயாரிப்புகளின் பாதுகாப்பு நிலை குறித்து பயனர்களைத் தவறாக வழிநடத்துவதன் மூலம் மெட்டா மாநிலத்தில் நியாயமற்ற நடைமுறைகள் சட்டத்தை மீறியதாகவும் நடுவர் மன்றம் கண்டறிந்தது.

தகவலறிந்த ஊழியர்கள் உட்பட 40 சாட்சிகளின் சாட்சியங்களைக் கேட்ட பிறகு, நூற்றுக்கணக்கான ஆவணங்கள், அறிக்கைகள், மின்னஞ்சல்களை மதிப்பாய்வு செய்த பின்னர் இந்த முடிவு எடுக்கப்பட்டது.

தனது இறுதி வாதங்களில், வழக்கறிஞர் லிண்டா சிங்கர், மெட்டாவின் வழிமுறைகள்  பயனர்களை இளைஞர்களால் பதிவேற்றப்பட்ட உள்ளடக்கத்திற்கு வழிநடத்தியது என்று வாதிட்டார், அதே நேரத்தில் நிறுவனம் இளைஞர்களுக்கு ஏற்படும் அபாயங்கள் குறித்த உள் கண்டுபிடிப்புகளை மறைத்தது.

இந்த வழக்கு அமெரிக்க முழுவதும் உள்ள சமூக ஊடக நிறுவனங்களுக்கு எதிரான ஆயிரக்கணக்கான ஒத்த வழக்குகளில் செல்வாக்கு செலுத்தக்கூடிய ஒரு அளவுகோலாக கருதப்படுகிறது.

இரண்டாம் கட்ட நடவடிக்கைகள் மே 4 ஆம் தேதி தொடங்க திட்டமிடப்பட்டுள்ளது, இதன் போது மெட்டாவுக்கு எதிராக கூடுதல் அபராதங்கள் உட்பட அதன் தளம் செயல்பாடுகளில் சில மாற்றங்களைச் செயல்படுத்த வேண்டும் என்ற அரசு தரப்பு கோரிக்கையை நீதிபதி விசாரிப்பார்.

கூடுதலாக, கலிபோர்னியாவில் உள்ள நடவடிக்கைகள் மெட்டா, யூடியூப் தங்கள் தளங்களில் குழந்தைகளுக்கு ஏற்படும் தீங்குகளுக்கு பொறுப்பேற்க வேண்டுமா என்பதையும் பரிசீலிக்கும்.

2023 ஆம் ஆண்டில், நியூ மெக்ஸிகோ அட்டர்னி ஜெனரல் ரவுல் டோரெஸ், பேஸ்புக், இன்ஸ்டாகிராம், வாட்ஸ்அப்பின் மூல நிறுவனமான மெட்டா, அதன் தலைமை நிர்வாக அதிகாரி மார்க் ஜுக்கர்பெர்க் மீது வழக்கு தொடர்ந்தார்.

இந்த வழக்கின் மூலம், பேஸ்புக், இன்ஸ்டாகிராமின் மூல நிறுவனம் சிறார்களை பாலியல் துஷ்பிரயோகம், இணைய மோசடி, மனித கடத்தல் ஆகியவற்றிலிருந்து பாதுகாக்க தவறிவிட்டதாக டோரெஸ் குற்றம் சாட்டினார்.

இது தொடர்பாக, அவர்கள் அதிகபட்சமாக 2.2 பில்லியன் அமெரிக்க டாலர் இழப்பீடு கோருகின்றனர்.

டோரெஸ், சந்தித்தபோது, குழந்தைகளின் பாதுகாப்பை விட லாபத்திற்கு முன்னுரிமை அளிக்க மெட்டா எடுத்த முடிவின் விளைவுகளை அனுபவிக்க வேண்டிய ஒவ்வொரு குழந்தைக்கும் குடும்பத்திற்கும் இந்த முடிவு ஒரு வரலாற்று வெற்றி என்று கூறினார்.

"மெட்டா நிர்வாகிகள் தங்கள் தயாரிப்பு குழந்தைகளுக்குத் தீங்கு விளைவிப்பதாக அறிந்திருந்தனர், தங்கள் சொந்த ஊழியர்களின் எச்சரிக்கைகளைப் புறக்கணித்தனர், மேலும் தங்களுக்குத் தெரிந்ததைப் பற்றி பொதுமக்களிடம் பொய் சொன்னார்கள்" என்று அவர் மேலும் கூறினார்.

எவ்வாறாயினும், இந்த முடிவை சவால் செய்வதாக மெட்டா கட்சி தெரிவித்துள்ளது.

இந்த முடிவுக்கு தாங்கள் உடன்படவில்லை என்றும் மேல்முறையீடு செய்வோம் என்றும் நிறுவனத்தின் செய்தித் தொடர்பாளர் தெரிவித்துள்ளார்.

 பயனர்களின் பாதுகாப்பை உறுதிப்படுத்த மெட்டா கடுமையாக உழைக்கிறது என்றும் தீங்கு விளைவிக்கும் உள்ளடக்கத்தை அடையாளம் கண்டு அகற்றுவதற்கான சவால்கள் குறித்து எப்போதும் தெளிவாக உள்ளது என்றும் குறிப்பிடப்பட்டுள்ளது.

-சங்கீர்த்தனா