"மதம் மாறினால் சலுகை கிடையாது": பட்டியல் சாதி அந்தஸ்து கிடையாது என்று இந்திய உச்ச நீதிமன்றத்தின் அதிரடித் தீர்ப்பு

டெல்லி:

இந்து, சீக்கிய அல்லது பௌத்த மதங்களைத் தவிர்த்துப் பிற மதங்களுக்கு மாறுபவர்கள், பட்டியல் சாதியினருக்கான (Scheduled Caste) அந்தஸ்தைத் தொடர முடியாது என்று இந்திய உச்ச நீதிமன்றம் செவ்வாய்க்கிழமை தீர்ப்பளித்துள்ளது. 

நீதிபதிகள் பி.கே. மிஸ்ரா, என்.வி. அஞ்சாரியா ஆகியோர் அடங்கிய அமர்வு, ஆந்திரப் பிரதேச உயர் நீதிமன்றத்தின் முந்தைய உத்தரவை உறுதி செய்து இந்தத் தீர்ப்பை வழங்கியது. இதன்படி, கிறிஸ்தவ மதத்திற்கு மாறி அந்த மதத்தைப் பின்பற்றுபவர்கள், தாங்கள் பிறப்பால் பட்டியல் சாதியினராக இருந்தாலும், அந்தச் சலுகையைப் பெறத் தகுதியற்றவர்கள் ஆகிறார்கள்.

அரசியலமைப்புச் சட்டத்தின் 1950-ஆம் ஆண்டு ஆணைப்படி, குறிப்பிட்ட சில மதங்களைத் தவிர்த்து மற்ற மதங்களுக்கு மாறுபவர்கள் பட்டியல் சாதி உறுப்பினராகக் கருதப்பட மாட்டார்கள் என்பது தெளிவாகக் கூறப்பட்டுள்ளது. 

இந்த விதிமுறையானது பிறப்பைக் காட்டிலும் பின்பற்றும் மதத்தையே அடிப்படையாகக் கொள்கிறது. எனவே, 1950-ஆம் ஆண்டு ஆணையில் குறிப்பிடப்படாத மதங்களைப் பின்பற்றுபவர்கள், தங்களுக்குரிய அந்தஸ்தை உடனடியாக இழக்க நேரிடும் என்று நீதிபதிகள் சுட்டிக்காட்டினர்.

இந்தத் தீர்ப்பின் மூலம், மதம் மாறிய நபர்கள் பட்டியல் சாதியினருக்கான சட்டப்பூர்வப் பலன்கள், பாதுகாப்பு, இடஒதுக்கீடு அல்லது அரசு உரிமைகளை எதையும் கோர முடியாது என்பது உறுதி செய்யப்பட்டுள்ளது. 

நாடாளுமன்றம் அல்லது மாநிலச் சட்டமன்றங்களால் இயற்றப்பட்ட சட்டங்களின் கீழ் வழங்கப்படும் எந்தவொரு சலுகையும் இவர்களுக்குப் பொருந்தாது. 

ஒரே நேரத்தில் 1950-ஆம் ஆண்டு ஆணையில் இல்லாத ஒரு மதத்தைப் பின்பற்றுவதும், அதே சமயம் பட்டியல் சாதி அந்தஸ்தைக் கோருவதும் சட்டப்படி சாத்தியமற்றது என்று நீதிமன்றம் தனது தீர்ப்பில் வலியுறுத்தியுள்ளது.

-கிரித்திக்கா