இன்ஸ்டாகிராமில் சிறார் பாலியல் தொடர்பான விளம்பரங்கள்: மெட்டாவுக்கு 7 நாட்களில் விளக்கம் அளிக்க இந்திய அரசு உத்தரவு

புதுடெல்லி: 

சமூக ஊடகத் தளமான இன்ஸ்டாகிராம் தளத்தில் குழந்தைகளுக்கு எதிரான பாலியல் துஷ்பிரயோக உள்ளடக்கம் கொண்ட கட்டண விளம்பரங்களை நீக்குமாறு மெட்டா நிறுவனத்துக்கு இந்திய அரசு எச்சரிக்கை நோட்டீஸ் அனுப்பி உள்ளது. 

மேலும், இது தொடர்பாக 7 நாட்களில் விரிவான விளக்கம் தரவும் உத்தரவிடப்பட்டுள்ளது.

மின்னணு, தகவல் தொழில்நுட்ப அமைச்சகம் பிறப்பித்துள்ள உத்தரவில் இன்ஸ்டா தளத்தில் இருந்து குழந்தைகளுக்கு எதிரான பாலியல் துஷ்பிரயோக உள்ளடக்கம் கொண்ட கட்டண விளம்பரங்களை உடனடியாக நீக்க வேண்டுமென தெரிவிக்கப்பட்டுள்ளது.

இணையத்தில் குழந்தைகளுக்கு எதிரான பாலியல் வன்கொடுமை தொடர்பான உள்ளடக்கங்களை பரப்புவதற்கு எதிராக ஒன்றிய அரசு மேற்கொண்டுள்ள நடவடிக்கையாக இது அமைந்துள்ளது. 

மேலும், டிஜிட்டல் தளங்கள் அரசின் விதிமுறைகளைக் கட்டாயம் பின்பற்ற வேண்டும் என தெரிவிக்கப்பட்டுள்ளது.

- ஆர்யன்