வெற்று மிரட்டலா அல்லது சதியா?: டெல்லி பள்ளிகள், சட்டசபைக்குத் தொடரும் மர்ம மின்னஞ்சல்கள்

புது டெல்லி:

டெல்லி சட்டப்பேரவைக்கு செவ்வாய்க்கிழமை காலை மீண்டும் மின்னஞ்சல் மூலம் வெடிகுண்டு மிரட்டல் வந்தது என்பது தெரிவிக்கப்பட்டுள்ளது. இது பாதுகாப்பு அமைப்புகளை வளாகத்தில் சோதனைகளை நடத்த தூண்டியுள்ளது. டெல்லி முதலமைச்சர் ரேக்கா குப்தா சட்டசபையில் 2026-27 பட்ஜெட்டை தாக்கல் செய்ய திட்டமிடப்பட்ட சில மணி நேரங்களுக்கு முன்பு இந்த அச்சுறுத்தல் வந்தது.

காலை 7.28 மணிக்கு சட்டசபையின் அதிகாரப்பூர்வ மின்னஞ்சலுக்கும், காலை 7.49 மணிக்கு சபாநாயகர் அலுவலகத்திற்கும் மின்னஞ்சல் அச்சுறுத்தல் அனுப்பப்பட்டது. டெல்லி காவல்துறை, தீயணைப்புத் துறை, வெடிகுண்டு கண்டறிதல் குழு, வெடிகுண்டு அகற்றும் படை, போலிஸ் நாய் படை ஆகியவற்றின் அதிகாரிகளுடன் இணைந்து சோதனைகளை நடத்தியது.

டெல்லி சட்டப்பேரவை வளாகத்தில் முழுமையான சோதனைகள் நடத்தப்பட்டுள்ளன என்றும் ஆனால் இதுவரை சந்தேகத்திற்கிடமான எதுவும் கண்டுபிடிக்கப்படவில்லை என்று துணை போலிஸ் ஆணையர் (வடக்கு) ராஜா பாந்தியா தெரிவித்துள்ளார்.

இதற்கிடையில் பிப்ரவரி 23 அன்று சட்டமன்ற அலுவலகம், சபாநாயகர் அலுவலகம், டெல்லி செயலகம், இரண்டு நகரப் பள்ளிகளுக்கு வெடிகுண்டு அச்சுறுத்தல் மின்னஞ்சல்கள் வந்தன. இருப்பினும் அவை விசாரணையின் பின்னர் போலியானவை என்று அறிவிக்கப்பட்டன. அடுத்த மூன்று நாட்களில் டெல்லி ராணுவப் பள்ளி, செங்கோட்டை, பெருநகரங்களில் குண்டுவெடிப்புகள் நடைபெறும் என்றும் அந்த மின்னஞ்சல் கூறியுள்ளது.

பிப்ரவரி 13 அன்று, லோதி தோட்டத்தில் உள்ள சர்தார் பட் டல் வித்யாலயா, கோல் மார்க்கெட்டில் உள்ள கேந்திரிய வித்யாலயா, பூசா சாலையில் உள்ள டெல்லி தமிழ் கல்வி சங்கம் உள்ளிட்ட பல பள்ளிகளுக்கு வெடிகுண்டு அச்சுறுத்தல் மின்னஞ்சல்கள் வந்தன.

அதற்கு முன்பு, பிப்ரவரி 9 அன்று, டெல்லி பப்ளிக் ஸ்கூல், ரோகினியில் உள்ள பால் பாரதி, சர்தார் பட்டேல் வித்யாலயா உட்பட சுமார் 12 பள்ளிகளுக்கு வெடிகுண்டு அச்சுறுத்தல் மின்னஞ்சல் வந்தது, பின்னர் அது ஒரு மோசடி என்று அறிவிக்கப்பட்டது.

ஜனவரி 29 அன்று, டெல்லியில் குறைந்தது எட்டு பள்ளிகளுக்கு அடையாளம் தெரியாத ஒருவரிடமிருந்து வெடிகுண்டு அச்சுறுத்தல் மின்னஞ்சல்கள் வந்தன. அவர் மின்னஞ்சல்களை அனுப்ப வி. பி. என். ஐப் பயன்படுத்தினார் என்பது கண்டறியப்பட்டுள்ளது. இதற்கு முந்தைய பெரும்பாலான மின்னஞ்சல் அச்சுறுத்தல்கள் காவல்துறையினரால் தீர்க்கப்படாமல் உள்ளன என்பதும் குறிப்பிடத்தக்கது.

-சங்கீர்த்தனா