மருத்துவ சாதன ஆணையத்தின் அதிரடி சோதனை: பதிவு செய்யாத லென்ஸ் விற்பனைக்கு முற்றுப்புள்ளி

கோலாலம்பூர்: 

பதிவு செய்யாத கண் லென்ஸ்களை சிறுதொழில் விற்பனையாளர்களுக்கு விநியோகிக்கும் வழங்குநர்களுக்கு எதிராக மருத்துவ சாதன ஆணையம் (எம்.டி.ஏ) தனது நடவடிக்கையை விரிவுபடுத்த உள்ளது. இது மார்ச் 16-ஆம் தேதி வங்சா மாஜு பகுதியில் மேற்கொள்ளப்பட்ட கூட்டு சோதனைக்குப் பின்னர் மேற்கொள்ளப்பட்ட தீர்மானமாகும்.

மூன்று மணி நேரம் நடைபெற்ற இந்தச் சோதனையில் 19 வணிக வளாகங்கள் ஆய்வு செய்யப்பட்டன. பரிந்துரை இல்லாமல், பதிவு செய்யாத லென்ஸ்கள் விற்பனை செய்யப்பட்டதாக முன் கிடைத்த தகவலின் அடிப்படையில் இந்த நடவடிக்கை மேற்கொள்ளப்பட்டது. 

பதிவு செய்யாத லென்ஸ்களை விற்றவர்களுக்கு உடனடியாக விற்பனை நிறுத்த உத்தரவிடப்பட்டதுடன், சிலருக்கு எச்சரிக்கை வழங்கி பொருட்களை அகற்றவும் அறிவுறுத்தப்பட்டது.

முன்னிலை விசாரணையில், இந்த லென்ஸ்கள் உள்ளூர் விற்பனையாளர்கள், தாய்லாந்து, சீனாவில் இருந்து இறக்குமதி, இணையம் மூலம் வாங்கப்படுவது போன்ற சீரற்ற விநியோக அமைப்பு இருப்பது தெரியவந்தது. சில கடைகள் உணவுப் பொருட்கள் அல்லது பொதுப் பொருட்கள் விற்பனை உரிமத்துடன் இயங்கியபோதும், கண் லென்ஸ்களை விற்பனை செய்ததும் கண்டறியப்பட்டது.

இதனைத் தொடர்ந்து, சட்டவிரோத விநியோகத்தின் மூலத்தையே குறிவைத்து மொத்த விற்பனையாளர்களுக்கும், வழங்குநர்களுக்கும் எதிராக நடவடிக்கை தீவிரப்படுத்தப்படும் என அதிகாரிகள் தெரிவித்துள்ளனர்.

-கிரித்திக்கா