மேற்காசிய பதற்றம் தாக்கம்: மலேசிய எரிசக்தி செலவில் அழுத்தம்

கோலாலம்பூர்: 

உலக எரிசக்தி சந்தையின் மாற்றங்களால், எண்ணெய், எரிவாயு உற்பத்தியாளராக இருந்தாலும், மலேசியா தற்போது உலகளாவிய விலை மாற்றங்களுக்கு நேரடியாக பாதிக்கப்படும் நிலையில் உள்ளது.

குறிப்பாக அமெரிக்கா–ஈரான் மோதல் அதிகரித்துள்ளதால் இந்த பாதிப்பு மேலும் தீவிரமடைந்துள்ளது.

பெட்ரோனாஸ் டகாங்கான் நிறுவனத்தின் தலைமை செயல் அதிகாரி அஸ்ருல் உஸ்மான் ராணி தெரிவித்ததாவது, மலேசியா தற்போது மூல எண்ணெயை அதிகமாக இறக்குமதி செய்யும் நாடாக மாறியுள்ளது. 

கடந்த காலத்தில் தினசரி 700,000 பீப்பாய்கள் உற்பத்தி செய்த நிலையில், இன்று அது சுமார் 350,000 பீப்பாய்களாக குறைந்துள்ளது. அதே நேரத்தில், நாட்டின் பொருளாதார வளர்ச்சியால் தேவைகள் அதிகரித்துள்ளன.

மேலும், நாட்டின் சுத்திகரிப்பு நிலையங்கள் மேற்காசிய பகுதிகளில் இருந்து இறக்குமதி செய்யப்படும் கனமான மூல எண்ணெய்களைச் செயலாக்கும் வகையில் வடிவமைக்கப்பட்டுள்ளன. 

இதனால் ஹோர்முஸ் நீரிணை போன்ற முக்கிய கடல் வழித்தடங்களில் ஏற்பட்டுள்ள அரசியல் பதற்றம், எரிசக்தி விநியோகத்தையும் செலவையும் நேரடியாக பாதிக்கிறது.

இந்த சூழ்நிலையில், மாற்று ஆதாரங்களை தொலைதூர பகுதிகளில் தேட வேண்டிய நிலை உருவாகி, கடல் போக்குவரத்து செலவு, காப்பீட்டு கட்டணங்கள் அதிகரித்துள்ளன. 

இதன் விளைவாக, உலக சந்தையில் எண்ணெய் விலை ஒரு பீப்பாய்க்கு 70 அமெரிக்க டாலரிலிருந்து 100 டாலரைத் தாண்டி உயர்ந்துள்ளது. இந்த உயர்வு, மலேசியாவின் எரிபொருள் செலவுகளிலும் தொடர்ச்சியான அழுத்தத்தை ஏற்படுத்தியுள்ளது.

-கிரித்திக்கா