மூன்று வாகனங்கள் மோதிய விபத்து: டாக்சி ஓட்டுநர் பலி, நால்வர் காயம்

குவாந்தான்:

ரோம்பின் பகுதியில், மலேசிய பனை எண்ணெய் வாரியத்தின் (MPOB) எடைக்கூடம் அருகே, குவாந்தான்–செகாமாட் சாலையின் 143வது கிலோமீட்டரில் நேற்று இரவு நடந்த மூன்று வாகனங்கள் மோதிய விபத்தில், ஒரு டாக்சி ஓட்டுநர் உயிரிழந்ததுடன்  நால்வர் காயமடைந்துள்ளனர்.

Toyota Vios, Proton Wira, Perodua Alza ஆகிய வாகனங்கள் மோதிய விபத்தில் சிக்கிய கிளந்தான் மாநிலம் கோத்தா பாருவைச் சேர்ந்த 60 வயதுடைய அப்துல் ரஹ்மான் யூசோஃப், நேற்று இரவு சுமார் 11.20 மணியளவில் முஆட்ஸாம் ஷா மருத்துவமனையில் சிகிச்சை பெறும் போது உயிரிழந்தார்.

ஆரம்பக்கட்ட விசாரணையில், 26 வயதுடைய Toyota Vios ஓட்டுநர் செகாமாட்டிலிருந்து குவாந்தான் நோக்கி சென்றுகொண்டிருந்ததாகவும், மற்ற இரண்டு வாகனங்கள் எதிர்திசையில் வந்ததாகவும் ரோம்பின் மாவட்ட காவல்துறைத் தலைவர், கண்காணிப்பாளர் ஷெரீப் மொண்டோய் கூறினார்.

“Toyota Vios ஓட்டுநர் வாகன கட்டுப்பாட்டை இழந்து எதிர்திசையில் நுழைந்து, எதிரே வந்த இரண்டு வாகனங்களை மோதியதாக நம்பப்படுகிறது.

தலையில் பலத்தக் காயங்களுக்கு உள்ளான Perodua Alza ஓட்டுநர், முஆட்ஸாம் ஷா மருத்துவமனையில் சிகிச்சை பெறும் போது உயிரிழந்தார்,” என்று அவர் இன்று வெளியிட்ட அறிக்கையில் தெரிவித்தார்.

மேலும், உயிரிழந்த டாக்சி ஓட்டுநரின் 58 வயதுடைய மனைவி, 20 வயது மகன், 14 வயது பேத்தி ஆகியோரும் காயமடைந்துள்ளதாக அவர் கூறினார்.

“Toyota Vios ஓட்டுநரும் காயமடைந்துள்ளார். 56 வயதுடைய Proton Wira ஓட்டுநர் காயமின்றி உயிர் தப்பினார். இந்த வழக்கு, 1987 ஆம் ஆண்டு சாலை போக்குவரத்து சட்டத்தின் பிரிவு 41(1) கீழ் விசாரிக்கப்பட்டு வருகிறது,” என்றார் அவர்.

இந்த விபத்து தொடர்பான தகவல்கள் உள்ளவர்கள், ரொம்பின் மாவட்ட போக்குவரத்து புலனாய்வு, அமலாக்கப் பிரிவு (BSPTD) விசாரணை அதிகாரி இன்ஸ்பெக்டர் நோர் அசிகின் தாவுத்  (011-10815434) அல்லது அருகிலுள்ள காவல் நிலையத்தை தொடர்பு கொண்டு உதவுமாறு அவர் கேட்டுக் கொண்டார்.

- சங்கீர்த்தனா