மதுரோவை  அமெரிக்க விடுவிக்க வேண்டும்: பிரதமர் வலியுறுத்து

கோலாலம்பூர்:

வெனிசுலா அதிபர் நிக்கோலஸ் மதுரோவையும் அவரது மனைவியையும் அமெரிக்க உடனடியாக விடுவிக்க வேண்டும்.

பிரதமர் டத்தோஸ்ரீ அன்வார் இப்ராஹிம் இதனை வலியுறுத்தினார்.

அமெரிக்கப் படைகளால் அவர்கள் தடுத்து வைக்கப்பட்டிருப்பது அசாதாரணமான செயல்.

மேலும் இது அனைத்துலக சட்டத்தின் தெளிவான மீறல் ஆகும்.

காரணம் எதுவாக இருந்தாலும், வெளிப்புற நடவடிக்கை மூலம் பதவியில் இருக்கும் அரசாங்கத் தலைவரை வலுக்கட்டாயமாக நீக்குவது ஒரு ஆபத்தான முன்னுதாரணத்தை அமைக்கிறது.

இது மாநிலங்களுக்கு இடையே பலத்தைப் பயன்படுத்துவதில் உள்ள அடிப்படைக் கட்டுப்பாடுகளை அரிக்கிறது.

குறிப்பாக சர்வதேச ஒழுங்கை ஆதரிக்கும் சட்ட கட்டமைப்பை குறைமதிப்பிற்கு உட்படுத்துகிறது.

வெனிசுலா மக்கள் தங்கள் அரசியல் எதிர்காலத்தை தாங்களே தீர்மானிக்கும் உரிமை அவர்களுக்கு உள்ளது.

வரலாறு காட்டியுள்ளபடி, வெளிப்புற சக்தியால் ஏற்படும் திடீர் தலைமை மாற்றம், குறிப்பாக நீண்டகால பொருளாதார நெருக்கடி, ஆழமான சமூக அழுத்தங்களுடன் ஏற்கனவே போராடி வரும் ஒரு நாட்டிற்கு, நன்மையைவிட தீமையையே செய்யும் என்று அவர் இன்று ஒரு அறிக்கையில் தெரிவித்தார்.

- பார்த்திபன் நாகராஜன்