ஆட்சிக் காலம் முடியும் வரை தேசிய முன்னணிக்கு பகாங் மஇகா ஆதரவாக இருக்கும்

குவாந்தான்:

ஆட்சிக் காலம் முடியும் வரை தேசிய முன்னணிக்கு பகாங் மாநில மஇகா ஆதரவாக இருக்கும்.

பகாங் மாநில மஇகா தலைவர் வி. ஆறுமுகம் இதனை தெரிவித்தார்.

கடந்த வாரம் நடைபெற்ற கட்சியின் 79ஆவது பொதுக் குழுவில் தங்கள் பேராளர்களால் அங்கீகரிக்கப்பட்ட தீர்மானம் குறித்து பகாங் மஇகா, 

தேசிய முன்னணி தலைவரும் மாநில மந்திரி புசாருமான டத்தோஸ்ரீ வான் ரோஸ்டி வான் இஸ்மாயிலிடம் விளக்கம் அளித்துள்ளது.

தேசிய முன்னணியை  விட்டு வெளியேறும் தீர்மானம் கூட்டத்தின் போது பெரும்பான்மை ஆதரவைப் பெற்றாலும், அது இன்னும் இறுதியானது அல்ல.

இந்த விஷயம் தலைவர் டான்ஸ்ரீ எஸ்.ஏ. விக்னேஸ்வரனால் விளக்கப்பட்டுள்ளது.

இந்த விஷயம் குறித்த இறுதி முடிவு கட்சியின் மத்திய செயற்குழு உறுப்பினர்களால் எடுக்கப்படும்.

நானும் மத்திய செயலவையில் இருக்கிறேன்.

மேலும் இந்த தீர்மானத்தை மேலும் விவாதிக்க நாங்கள் எந்த கூட்டமும் நடத்தவில்லை.

இந்த தீர்மானத்தைப் பொறுத்தவரை, நடப்புப் பதவிக்காலம் முடியும் வரை பகாங் தேசிய முன்னணியை ஆதரிப்பேன் என்று டத்தோஸ்ரீ வான் ரோஸ்டிக்குத் தெரிவித்துள்ளேன் என்று அவர் தெரிவித்தார்.

- பார்த்திபன் நாகராஜன்