மித்ரா நிதி தொடர்பில் முரண்பாடான வாக்குமூலம் வழங்கிய குற்றச்சாட்டை பெண் ஒருவர் மறுத்து விசாரணை கோரியுள்ளார்

கோலாலம்பூர்:

மித்ரா நிதி தொடர்பில் முரண்பாடான வாக்குமூலம் வழங்கிய குற்றச்சாட்டை பெண் ஒருவர் மறுத்து விசாரணை கோரியுள்ளார்

எம்ஏசிசியிடம் முரண்பாடான வாக்குமூலங்களை வழங்கியதாக சுமத்தப்பட்ட மூன்று குற்றச்சாட்டுகளை அவர் ஷாஆலம் செஷன்ஸ்  நீதிமன்றத்தில் மறுத்துள்ளார்.

மலேசிய இந்திய சமூக மாற்றப் பிரிவின் (மித்ரா) நிதி சம்பந்தப்பட்ட விசாரணையுடன் தொடர்புடையது என்று எம்ஏசிசி ஓர் அறிக்கையில் தெரிவித்துள்ளது.

கடந்த 2013ஆம் ஆண்டு  டிசம்பர் 20ஆம் தேதி சிலாங்கூரில் உள்ள பிரிமா ஸ்ரீ கோம்பாக்கில் உள்ள ஒரு வளாகத்தில் ஒரு சத்தியப்பிரமாண ஆணையரிடம் சத்தியப்பிரமாண அறிக்கையை வழங்கியதாக 35 வயதான வி மீனலோஷினி மீது குற்றம் சாட்டப்பட்டுள்ளது.

இது 2022ஆம் ஆண்டு  ஜனவரி 24, 25 தேதியன்று புத்ராஜெயாவில் உள்ள எம்ஏசிசி தலைமையகத்தில் அதிகாரிகளுக்கு வழங்கப்பட்ட வாக்குமூலம், அறிக்கைக்கு முரணானது.

பிரமாணப் பத்திரத்தில் உள்ள அறிக்கையில், குற்றம் சாட்டப்பட்டவர் மித்ரா நிதியை செலுத்துவதற்கான உரிமைகோரல்களைச் செய்த ஒப்பந்ததாரர்களுடன் நேரடியாகக் கையாண்டதாகவும், இந்த விஷயம் தொடர்பாக எந்த நபருடனும் ஒருபோதும் கையாண்டதில்லை என்றும் கூறுகிறது.

இருப்பினும் எம்ஏசிசி அதிகாரிகளுக்கு அளித்த அறிக்கையில், குற்றம் சாட்டப்பட்டவர் ஒவ்வொரு ஒப்பந்ததாரருக்கும் பணம் செலுத்துவது காசோலை, ஆன்லைன் பரிமாற்றம் அல்லது ரொக்கம் மூலம் நேரடியாகச் செய்யப்படும் என்று கூறினார் என்று அந்த அறிக்கையில் கூறப்பட்டுள்ளது.

- பார்த்திபன் நாகராஜன்