மன்னிப்பு வாரியம் நஜிப்பின் வீட்டுக் காவலைப் பற்றி விவாதிக்கவில்லை:  அரசு வழக்கறிஞர் 

புத்ரா ஜெயா:

நஜிப் ரசாக்கின் எஞ்சிய தண்டனைக் காலத்தை வீட்டுக் காவலில் அனுபவிக்க அனுமதித்ததாகக் கூறப்படும் சேர்க்கையின் உள்ளடக்கம், மத்தியப் பிரதேச மன்னிப்பு வாரியத்தால் ஒருபோதும் விவாதிக்கப்படவில்லை என்று மூத்த கூட்டரசு வழக்கறிஞர் ஷம்சுல் போல்ஹாசன் மேல்முறையீட்டு நீதிமன்றத்தில் தெரிவித்துள்ளார்.

கடந்த ஆண்டு ஜனவரி 29-ஆம் தேதி, அல்-சுல்தான் அப்துல்லா சுல்தான் அஹ்மத் ஷா தலைமையில், நஜிப்பின் 12 ஆண்டுகள் சிறைத்தண்டனையைப் பாதியாகக் குறைப்பது தொடர்பாக, பேரரசர் தலைமையில் நடைபெற்ற மன்னிப்பு வாரியத்தின் 61-ஆவது கூட்டத்தில் முடிவு எடுக்கப்பட்டது என்றார் அவர். 

அபராதம் RM50 மில்லியனாக குறைக்கப்பட்டது.

புதிய ஆதாரங்களைச் சமர்பிக்க நஜிப்பின் கோரிக்கைக்கு எதிர்ப்பு தெரிவித்த ஷம்சுல் ஆட்சிக்குழு கூட்டத்தில் கூடுதல் சேர்க்கை பரிசீலிக்கப்படவில்லை என்றார்.

நீதிபதி அசிசா நவாவி தலைமையிலான மூன்று நீதிபதிகள் குழுவிடம் அவர், அந்த விஷயத்தை மட்டுமே அடிப்படையாகக் கொண்டு, நீதிமன்றம் விண்ணப்பத்தை நிராகரிக்க வேண்டும் என்று கூறினார்.

நீதிபதி அசஹரி கமால் ரம்லி மற்றும் நீதிபதி ஃபிரூஸ் ஜாஃப்ரில் ஆகியோரும் இந்த குழுவில் இருந்தனர்.

சில நிபந்தனைகள் நிறைவேற்றப்பட்டால், நஜிப் முன்கூட்டியே விடுவிக்கப்படுவார் என்பதை சிறைத்துறை உறுதிப்படுத்தியது என்று ஷம்சுல் கூறினார்.

முந்தைய பேரரசரின் உத்தரவு கையொப்பமிடப்பட்டு, மத்திய பிரதேச அமைச்சருக்கு அனுப்பப்படுவதற்கு முன்பு சீல் வைக்கப்பட்டதாகவும், பின்னர் அவர் ஒரு செய்திக்குறிப்பை வெளியிட்டதாகவும் அவர் கூறினார்.

சுல்தான் அப்துல்லா பிறப்பித்ததாகக் கூறப்படும் அரச உத்தரவை அமல்படுத்துமாறு அரசாங்கத்தை நிர்ப்பந்திக்க நஜிப் தனது முறையீட்டில் புதிய ஆதாரங்களை முன்வைக்க முயன்றார்.

SRC இன்டர்நேஷனல் Sdn Bhd க்கு சொந்தமான RM41 மில்லியன் நிதியை உள்ளடக்கிய அதிகார துஷ்பிரயோகம், நம்பிக்கை மீறல் மற்றும் பணமோசடி ஆகிய குற்றங்களுக்காக முன்னாள் பிரதமர் ஆகஸ்ட் 23, 2022 முதல் சிறையில் அடைக்கப்பட்டுள்ளார்.

மறுஆய்வை அனுமதிக்கும் நஜிப்பின் விண்ணப்பத்தை உயர்நீதிமன்றம் முன்பு நிராகரித்தது.

இது தற்போதைய மேல்முறையீட்டுக்கு வழிவகுத்தது.

- அஸ்வினி செந்தாமரை