சிங்கப்பூர், லண்டன் விமானங்கள் தாமதம்: சென்னை விமான நிலையத்தில் பல மணி நேரம் காத்திருந்த பயணிகள்

சென்னை: 

சிங்கப்பூர், லண்டன் செல்ல வேண்டிய விமானங்களில் தொழில்நுட்பக் கோளாறு ஏற்பட்டதால், சென்னை விமான நிலையத்தில் 500க்கும் மேற்ப்பட்ட பயணிகள் பல மணி நேரம் காத்திருந்து பயணித்தனர்.

லண்டனில் இருந்து பிரிட்டிஷ் ஏர்வேஸ் பயணிகள் விமானம் தினமும் அதிகாலை 3.30 மணிக்கு சென்னை வந்துவிட்டு, மீண்டும் அதிகாலை 5.30 மணிக்கு சென்னையில் இருந்து லண்டன் புறப்பட்டுச் செல்வது வழக்கம் ஆகும். 

இந்த நிலையில், லண்டனில் இருந்து சுமார் 300 பயணிகளுடன் சென்னைக்கு வந்து கொண்டிருந்த விமானத்தில் திடீரென்று தொழில்நுட்பக் கோளாறு ஏற்பட்டதால், அந்த விமானம் சவுதி அரேபியாவின் ரியாத் விமான நிலையத்தில் அவசரமாக தரையிறங்கியது. 

லண்டனில் இருந்து வந்த விமானத்தில் தொழில்நுட்பக் கோளாறு ஏற்பட்டுள்ளதால், சென்னையில் இருந்து லண்டன் புறப்படும் விமானம் தாமதம் ஆகும் என்று அறிவிக்கப்பட்டு, 317 பயணிகளும் ஓய்வு அறைகளில் தங்கவைக்கப்பட்டனர்.

அதேபோல், சென்னையில் இருந்து சிங்கப்பூர் செல்லும் ஏர் இந்தியா எக்ஸ்பிரஸ் பயணிகள் விமானம், தொழில்நுட்பக் கோளாறு காரணமாக சிங்கப்பூரில் இருந்தே தாமதமாக சென்னைக்கு வந்தது. 

இதனால், சென்னையில் இருந்து  அதிகாலை 1.40 மணிக்கு சிங்கப்பூர் புறப்பட வேண்டிய விமானம் அதிகாலை 4 மணிக்கு புறப்பட்டது. ஓய்வு அறைகளில் தங்கவைக்கப்பட்டிருந்த 188 பயணிகளும் அந்த விமானத்தில் சென்னையில் இருந்து சிங்கப்பூர் சென்றனர்.

- பார்த்திபன் நாகராஜன்