திருமணம் செய்யாமல் சேர்ந்து வாழ்ந்த பெண்ணை வெட்டி குக்கரில் வேக வைத்த நபர் கைது

தாணே:

மகாராஷ்டிரம் தாணே மாவட்டத்தில், திருமணம் செய்யாமல் சேர்ந்து வாழ்ந்த பெண்ணை கொலை செய்து, உடலை துண்டு துண்டாக வெட்டி, குக்கரில் வேக வைத்த நபர் கைது செய்யப்பட்டார்.

மும்பை போலீஸார் கூறுகையில், கிழக்கு மீரா சாலை பகுதியில் உள்ள அடுக்குமாடி குடியிருப்பில் இந்த கொடூர சம்பவம் நிகழ்ந்துள்ளது.

அடுக்குமாடி குடியிருப்பில், 32 வயதான சரஸ்வதி வைத்யா என்ற பெண்ணும், 56 வயதான மனோஜ் சானே என்ற நபரும் திருமணம் செய்து கொள்ளாமல் ஒன்றாக வாழ்ந்து வந்துள்ளனர். மனோஜ், ரேஷன் கடை ஊழியர் ஆவார்.

இந்நிலையில், அவர்களின் வீட்டில் இருந்து கடுமையான துர்நாற்றம் வீசுவதாக காவல்துறைக்கு புதன்கிழமை தகவல் கிடைக்கப் பெற்றது.

இதையடுத்து, அந்த வீட்டில் நடத்தப்பட்ட சோதனையில், சமைலறை  முழுவதும் பாத்திரங்கள், வாளிகளில் உடல் பாகங்கள் இருந்தன.

குக்கரில் வேகவைக்கப்பட்ட நிலையிலும், அரவை இயந்திரத்தில் அரைக்கப்பட்ட நிலையிலும் சில உடல் பாகங்கள் இருந்தன.  

சரஸ்வதியை படுகொலை செய்த மனோஜ், உடலை துண்டு துண்டாக வெட்டி, அவற்றை அப்புறப்படுத்த முயற்சித்துள்ளார். உடல் பாகங்களை வேகவைத்து, தெரு நாய்களுக்கு அவர் வீசியிருக்கலாம் என சந்தேகிக்கப்படுகிறது. இச்சம்பவத்தைத் தொடர்ந்து, மனோஜ் கைது செய்யப்பட்டார்.

சரஸ்வதி தற்கொலை செய்துகொண்டார் என்று மனோஜ் கூறி வருகிறார்.

- ஆர்யன்