ஹாடி அவாங் தனது கருத்தைத் திரும்பப் பெறுவதுடன் மன்னிப்புக் கோர வேண்டும்: சிவமலர் வலியுறுத்தல்

கோலாலம்பூர்:

பாஸ் கட்சியின் தலைவர் டான்ஸ்ரீ அப்துல் ஹாடி அவாங் தேர்தல் பிரச்சாரத்தின் இறுதிக் கூட்டத்தில் தெரிவித்ததாக வெளியான கருத்துக்கு கெஅடிலான் கட்சியின் துணைப் பொதுச் செயலாளரும் சிவமலர் கணபதி கடும் கண்டனத்தை தெரிவித்துள்ளார்.

முஸ்லிம்களையும் முஸ்லிம் அல்லாதவர்களையும் குறித்த ஹாடி அவாங் தெரிவித்த கருத்து, மிகவும் கண்டிக்கத்தக்கது.

குறிப்பாக மக்களிடையே பிளவை ஏற்படுத்தக்கூடியதுமாகும் என்று அவர் குறிப்பிட்டார்.

ஒருவரின் நன்மை, தீமையை அவர் சார்ந்த மதத்தின் அடிப்படையில் மதிப்பிடக்கூடாது.

மாறாக, அவர்களின் செயல்களின் அடிப்படையிலேயே மதிப்பிட வேண்டும் என்று அவர் வலியுறுத்தினார்.

குறிப்பாக, மலாக்கா மாநிலத் தேர்தலுக்கு இன்னும் 24 மணி நேரத்திற்கும் குறைவான காலமே உள்ள நிலையில், தேர்தல் பிரச்சார மேடையில் இத்தகைய மதப் பாகுபாட்டைத் தூண்டும் கருத்து வெளியிடப்பட்டிருப்பது கவலை அளிப்பதாக அவர் தெரிவித்தார்.

மேலும், ஹாடி அவாங்கின் கருத்து குறித்து மசீச, மஇகா, எம்ஐபிபி, கெராக்கான் கட்சிகள் ஏன் மௌனம் காக்கின்றன என்றும் அவர் கேள்வி எழுப்பினார்.

அரசியல் ஆதாயத்திற்காகவும் தேர்தல் தொகுதிகளுக்காகவும் சமூக நல்லிணக்கத்தைப் பாதுகாக்கும் கொள்கைகளை விட்டுக்கொடுக்கக் கூடாது என்றார்.

எனவே, ஹாடி அவாங் தனது கருத்தை உடனடியாகத் திரும்பப் பெற்று, பகிரங்கமாக மன்னிப்புக் கோர வேண்டும்

தேசிய முன்னணி, தேசியக் கூட்டணி தலைவர்களும் இவ்விவகாரத்தில் தங்களது நிலைப்பாட்டைத் தெளிவுபடுத்த வேண்டும் என்றும் சிவமலர் கோரிக்கை விடுத்தார்.

மலாக்கா மக்கள் நாளை வாக்களிக்கும்போது வேட்பாளர்களை மட்டுமின்றி, மக்களை ஒன்றிணைக்கும் தலைமைத்துவத்தையும் மத நல்லிணக்கத்தைப் பாதுகாக்கும் அரசியல் கட்சிகளையும் மதிப்பிட்டு முடிவெடுக்க வேண்டும் என்றும் அவர் வலியுறுத்தினார்.

- பார்த்திபன் நாகராஜன்