நஜிப்பிற்கு மன்னிப்பு வழங்குவது மாமன்னரின் தனிப்பட்ட உரிமை; ஜாஹித், தேசிய முன்னணி மீது ஏன் பழி சுமத்த வேண்டும்?: டான்ஸ்ரீ விக்னேஸ்வரன்

கோலாலம்பூர்:

முன்னாள் பிரதமர் டத்தோஸ்ரீ நஜிப் ரசாக்கிற்கு மன்னிப்பு வழங்கும் முடிவு மாமன்னரின் தனிப்பட்ட உரிமையாகும்.

ஆக அந்த முடிவிற்காக அம்னோ-தேசிய முன்னணி, டத்தோஸ்ரீ டாக்டர் அஹ்மத் ஜாஹித் ஹமிடி மீது ஏன் பழி சுமத்த வேண்டும்? என்று மஇகாவின் தேசியத் தலைவர் டான்ஸ்ரீ எஸ்.ஏ. விக்னேஸ்வரன் கேள்வி எழுப்பினார்.

இந்த முடிவு தொடர்பாக அம்னோ-தேசிய முன்னணி மீது குற்றம் சாட்டுவதை அவர் ஒரு அரசியல் கேலிக்கூத்து போலக் கருதுகிறார்.

அதுமட்டுமின்றி, இந்தக் கூட்டணி நான்கு ஆண்டுகளாக அமைதியாக இருந்து, நம்பிக்கை கூட்டணி தலைமையிலான ஒருமைப்பாட்டு அரசாங்கத்தை ஆதரித்து வந்துள்ளது என்பதையும் அவர் குறிப்பிட்டார்.

முன்னாள் பிரதமருக்கு மன்னிப்பு வழங்கப்பட வேண்டும் என்ற ஆதரவைத் தெரிவிப்பது உட்பட, மனிதாபிமான அடிப்படையில் நஜிப்பின் தலைவிதிக்காகப் போராட அம்னோ-தேசிய முன்னணிக்கு உரிமை உண்டு.

ஆதரவைத் தெரிவிக்கும் உரிமை இருப்பதால், மன்னிப்பு வழங்குவது அல்லது வீட்டுக் காவலை அமல்படுத்துவது குறித்த முடிவைத் தீர்மானிக்கும் அதிகாரம் அம்னோ-தேசிய முன்னணிக்கு உள்ளது என்று அர்த்தமல்ல.

ஏனெனில், இந்த விவகாரம் மாமன்னரின் தனிப்பட்ட அதிகாரத்திற்கு உட்பட்டது.

அப்படியென்றால், அந்த முடிவுக்கு அவர்களே பொறுப்பானவர்கள் என்பது போல, அம்னோ-தேசிய முன்னணி, ஜாஹித் ஏன் விமர்சனத்திற்கு உள்ளாக்கப்படுகிறார்கள்? என்று டான்ஸ்ரீ விக்னேஸ்வரன்  கூறினார்.

நஜிப்பின் நண்பர் என்ற முறையில், முன்னாள் பிரதமரை ஆதரிக்க அகமது ஜாஹித்துக்கு நிச்சயமாகக் காரணங்கள் இருந்தன.

ஆனால் அந்த நட்பின் காரணமாக அரச குடும்ப முடிவுகளைத் தீர்மானிக்கும் அதிகாரம் அவருக்கு இல்லை என்று டான்ஸ்ரீ விக்னேஸ்வரன் கூறினார்.

- பார்த்திபன் நாகராஜன்