முத்தியாரா இலகுரக ரயில் திட்டப் பணிகளுக்காக, ஜார்ஜ் டவுனில் உள்ள ஜாலான் சுல்தான் அஸ்லான் ஷா சாலைப் பாதைகள் 45 நாட்களுக்கு இரவில் மூடப்படும்

ஜார்ஜ் டவுன்:

முத்தியாரா இலகுரக ரயில் திட்டத்திற்கான மரம் வெட்டும் பணிகளுக்கு வசதியாக, ஜார்ஜ் டவுனில் உள்ள ஜாலான் சுல்தான் அஸ்லான் ஷா சாலையில் நவம்பர் 16 முதல் டிசம்பர் 31 வரை 45 நாட்களுக்குப் பகுதி நேரச் சாலை மூடப்படும் என மலேசிய விரைவுப் போக்குவரத்துக் கழகம் எம்.ஆர்.டி. கார்ப் அறிவித்துள்ளது.

இந்த மூடல்கள், ஜாலான் சுங்கை துவா சந்திப்புக்கும் மலேசிய அறிவியல் பல்கலைக்கழக மைதானத்திற்கும் இடையேயும், பத்து உபான் இராணுவ முகாமுக்கு அருகிலும் உள்ள பல்வேறு சாலைப் பாதைகளைப் பாதிக்கும். 

இது பெரும்பாலும் இரவு 10 மணி முதல் அதிகாலை 5 மணி வரையிலான இரவு நேரங்களில் நடைபெறும். சாலைப் பயனாளர்கள் எச்சரிக்கையுடன் இருக்குமாறு அறிவுறுத்தப்படுகிறார்கள். 

மேலும், பாதுகாப்பை உறுதி செய்வதற்கும், போக்குவரத்து சீராகச் செல்வதற்கும், அறிவிப்புப் பலகைகள், கூம்புகள், கொடி ஏந்திய காவலர்கள் உள்ளிட்ட போக்குவரத்து மேலாண்மை நடவடிக்கைகள் மேற்கொள்ளப்படும் என்று எம்.ஆர்.டி. நிர்வாகம் அறிவித்துள்ளது.

- பார்த்திபன் நாகராஜன்