7.2 மில்லியன் ரிங்கிட் நிதியுதவி: ஆபத்தான நிலையில் உள்ள இளைஞர்களுக்கு இரண்டாவது வாய்ப்பை வழங்குகிறது

கோலாலம்பூர்:

இந்திய இளைஞர்களின் உருமாற்றம் மேம்பாட்டிற்காக மைஸ்கில் அறவாரியத்திற்கு அமலான் செத்தார் நிறுவனம் 7.2 மில்லியன் ரிங்கிட்டை நிதியுதவியாக வழங்கியுள்ளது.

இது குறித்து அந்நிறுவன தலைமை இயக்குநரும்  நன்கொடையாளருமான டத்தோஸ்ரீ ஆர். ராஜேந்திரன் கூறியதாவது,

நலிவடைந்த இளைஞர்களுக்கு உதவுவது என்பது வெறும் நிதி உதவி வழங்குவது மட்டுமல்ல, மாறாக, கல்விப் படிப்பை பாதியில் கைவிட்டவர்களுக்குத் தங்கள் வாழ்க்கையை மீண்டும் கட்டமைத்துக் கொள்ள ஒரு வாய்ப்பை வழங்குவதாகும்.

இடர்ப்பாட்டில் உள்ள இளைஞர்கள், பள்ளிப் படிப்பை பாதியில் கைவிட்டவர்களுக்குத் தொழிற்திறன் பயிற்சி மற்றும் ஆளுமை மேம்பாட்டுத் திட்டங்களை வழங்கும் மைஸ்கில் அறவாரியத்திற்கு வழங்கிய நிதியின் நோக்கம் இதுவேயாகும்.

பல தொண்டு நிறுவனங்கள் தேவைப்படும் மாணவர்களுக்கு நிதியுதவி வழங்குகின்றன. ஆனால் மைஸ்கில் வித்தியாசமானது. 

இது பள்ளிப் படிப்பை பாதியில் நிறுத்திய மாணவர்களை எதிர்மறையான சூழல்களிலிருந்து மீட்டு, ஒரு புதிய சூழலில் அவர்கள் சிறந்து விளங்குவதற்கான வாய்ப்பை வழங்குகிறது. 

அதுதான் இந்த அமைப்பைச் சிறப்பானதாக ஆக்குகிறது என்று அமலான் செத்தார் நிறுவனத்தின் ஆண்டு இரவு விருந்தில் அவர் கூறினார்.

முன்னதாக, ராஜேந்திரன் தனது சகோதரரின் நினைவாக 'பாலாவின் தங்கும் விடுதி' என்ற பெயரில் ஒரு மாணவர் தங்கும் விடுதியைக் கட்டுவதற்காக மைஸ்கில்ஸ் அமைப்புக்கு 400,000 பங்களித்திருந்தார்.
முன்னதாக  2010-ல் நிறுவப்பட்ட மைஸ்கில்ஸ், ஆரம்பத்தில் பூச்சோங்கில் வாடகைக்கு எடுக்கப்பட்ட ஒரு கடையிலிருந்து செயல்பட்டது. 

பின்னர் போர்ட் கிள்ளானிற்கு இடம் பெயர்ந்து, இறுதியாக 2018-ல் கலம்பாங்கில் ஒரு நிரந்தர வளாகத்தை அமைத்தது.

சமீபத்திய நன்கொடையானது, அறக்கட்டளையின் நிரந்தர நிதியை 15 மில்லியன் ரிங்கிட்டாக உயர்த்தியுள்ளது. 

இது, அடுத்த ஆண்டுக்கு நிர்ணயிக்கப்பட்ட 20 மில்லியன் ரிங்கிட் இலக்கை விட 5 மில்லியன் ரிங்கிட் குறைவாகும்.

நன்கொடைகள், மானியங்களை முழுமையாகச் சார்ந்திருக்காமல், நலிவடைந்த இளைஞர்களுக்கு அமைப்பு தொடர்ந்து ஆதரவளிப்பதை உறுதிசெய்ய இந்த நிரந்தர நிதி மிகவும் முக்கியமானது என்று மைஸ்கில் அறவாரியத்தின் தலைமைச் செயல் அதிகாரி ஜி. தேவஷர்மா கூறினார்.

16 ஆண்டுகளாகச் செயல்பட்டு வரும் இந்த அறக்கட்டளை, ஆண்டுதோறும் கிட்டத்தட்ட 4 மில்லியன் ரிங்கிட்டை செலவிடுகிறது. 

அதே சமயம், 20 மில்லியன் ரிங்கிட் நிரந்தர நிதியானது, ஆண்டுதோறும் 1 மில்லியன் முதல் 1.5 மில்லியன் ரிங்கிட் வரையிலான முதலீட்டு வருமானத்தை உருவாக்கும் என்று எதிர்பார்க்கப்படுகிறது.

- பார்த்திபன் நாகராஜன்