போதைப்பொருள் கூடாரமாக ஆலயம் பயன்படுத்தப்பட்டதாகக் குற்றச்சாட்டு; சமரசமின்றி கடும் நடவடிக்கை எடுக்க வேண்டும்: மஹிமா

கோலாலம்பூர்:

ஆலயங்களை போதைப்பொருள் சேமிப்புக் கிடங்குகளாகப் பயன்படுத்துவது உள்ளிட்ட குற்றச் செயல்களுக்கு எந்தவித சமரசமும் காட்டக்கூடாது.

மஹிமா தலைவர் டத்தோக் என். சிவக்குமார் இதனை வலியுறுத்தியுள்ளார்.

வழிபாட்டுத் தலம் போதைப்பொருள் சேமிக்கும் இடமாகப் பயன்படுத்தப்பட்டதாகக் கூறப்படும் சம்பவத்தில், 162 மில்லியன் ரிங்கிட் மதிப்பிலான போதைப்பொருட்கள் பறிமுதல் செய்யப்பட்டதுடன், எட்டு பேர் கைது செய்யப்பட்டதாக வெளியான தகவலைத் தீவிரமாகக் கருத வேண்டும்.

மதத்தின் பெயரையோ வழிபாட்டுத் தலங்களையோ பயன்படுத்திக் குற்றச் செயல்களில் ஈடுபடும் எந்தவொரு நபரையும் மஹிமா பாதுகாக்காது.

எந்தவொரு நபரின் பின்னணி, பதவி அல்லது அடையாளத்தைப் பொருட்படுத்தாமல் சட்டம் அமல்படுத்தப்பட வேண்டும்.என்று அவர் வெளியிட்ட அறிக்கையில் குறிப்பிட்டார்.

வழிபாட்டுத் தலங்கள் புனிதமான இடங்களாகும். 

அவை சமயம், ஆன்மிகம் மற்றும் சமூக நலப் பணிகளுக்கான மையங்களாகச் செயல்படுகின்றன. எனவே, சட்டவிரோத நடவடிக்கைகளால் அவற்றின் புனிதத்தன்மை பாதிக்கப்படக்கூடாது.

மேலும், போலிஸ் சம்பந்தப்பட்ட அமலாக்க அமைப்புகள் மேற்கொள்ளும் விசாரணைகளுக்கும், குற்றம் நிரூபிக்கப்படும் நபர்களுக்கு எதிராக உரிய நடவடிக்கை எடுப்பதற்கும் மஹிமா ஆதரவு அளிப்பதாக அவர் தெரிவித்தார்.

- பார்த்திபன் நாகராஜன்