யாரும் கண்காணிக்காதபோதும் சரியானதைச் செய்வதே நேர்மை: டத்தோ வீரா ஷாகுல்

கோலாலம்பூர்:

கலாசாரம் என்பது பழக்கவழக்கங்கள் மட்டுமல்ல, விசுவாசம், நேர்மை, ஒழுக்கம், பொறுப்புணர்வு, மரியாதை ஆகியவை அன்றாடச் செயல்களில் வெளிப்படுவதுதான் என்று லயோலா கல்லூரியின் முன்னாள் மாணவர்கள் ஒன்றுகூடல் நிகழ்வில் டத்தோ வீரா ஷாகுல் தாவுத் கூறினார்.

தலைமுறைகளுக்கிடையிலான மாற்றம் என்பது கவனிக்கத்தக்கது. எனது தந்தை ஒரே நிறுவனத்தில் 52 ஆண்டுகள் பணியாற்றி, குடும்பத்தின் நலனையும் நிலையான வாழ்க்கையையும் வெற்றியாகக் கருதினார். 

ஆனால், இன்றைய இளைய தலைமுறையோ ஒரே நேரத்தில் பல வேலைகள், தொழில்கள், திறன்கள் எனப் பல பாதைகளில் செயல்படுகிறது. 

பெற்றோரும் நிறுவனங்களும் இந்த மாற்றத்தைப் புரிந்துகொண்டு இளையோருடன் உரையாட வேண்டும் என்று டத்தோ வீரா ஷாகுல் கூறினார்.

நம் ஒவ்வொருவருக்கும் நேர்மை பொறுப்புணர்வு இருக்க வேண்டும்

யாரும் கண்காணிக்காதபோதும் சரியானதைச் செய்வதே நேர்மை என்றார் அவர். 

சமூக ஊடகங்களில் சரிபார்க்கப்படாத தகவல்களும் தனிநபர் தாக்குதல்களும் பரவுவதால், செய்திகளைச் சரிபார்த்து பொறுப்புடன் பகிர்வது அவசியம் என்று அவர் குறிப்பிட்டார்.

பணியிடக் கலாசார மாற்றம்: அனுபவமுள்ள மூத்த ஊழியர்களும் புதிய தலைமுறை ஊழியர்களும் ஒருவரையொருவர் புரிந்துகொள்ள வேண்டும் என்றார் டத்தோ வீரா ஷாகுல். 

அனுபவமும் கல்வியும் இணைந்தால்தான் சிறப்பாக முன்னேற முடியும். அதனை நாம் புரிந்துகொள்ள வேண்டும் என்றார் அவர்.

தொடர்ந்து கற்றல்: 
தொழில்நுட்பமும் செயற்கை நுண்ணறிவும் வேலைகளை மாற்றினாலும், தொடர்ந்து திறன்களை மேம்படுத்துபவர்கள் அதற்கேற்ப முன்னேறலாம். கற்றலுக்கு வயது வரம்பில்லை.

ஆரோக்கியமும் நல்ல பழக்கங்களும்: வாசிப்பது, உடல்நலத்தைப் பேணுவது, உணவில் அளவைக் கடைப்பிடிப்பது, எழுதிப் பழகுவது போன்ற பழக்கங்கள் நீண்டகால நலனுக்கும் நினைவாற்றலுக்கும் உதவும் என்று அவர் கூறினார்.

- நல்ல நிர்வாகம்: வணிகத்தில் லாபம் மட்டுமல்ல, நேர்மையும் வலுவான நிர்வாக முறைகளும் முக்கியம்; அவை நிறுவனத்தின் நீண்டகால நம்பகத்தன்மையைப் பாதுகாக்கின்றன.

- மலேசியாவின் வாய்ப்புகள்: 

நாட்டின் மனிதவளம், துறைமுகங்கள், சுற்றுலா வளங்கள், வணிகச் சூழலைக் குறிப்பிட்டு, மலேசியா முதலீடு, தொழில்களுக்கு ஏற்ற இடம் என டத்தோ வீரா ஷாகுல் தனது உரையில் குறிப்பிட்டுப் பேசினார்.

ஒரு நாட்டின் மிகப் பெரிய மூலதனம் பணமல்ல—மனிதவளமே. மனிதர்களை மதித்து, கண்ணியத்துடன் நடத்தி, அவர்களின் திறன்களை வளர்ப்பதே வலுவான சமூகத்திற்கும் நிறுவனத்திற்கும் அடித்தளம் என்று நிறைவாக டத்தோ வீரா ஷாகுல் கூறினார்.

லயோலா கல்லூரியின் முன்னாள் மாணவர்கள் ஒன்றுகூடல் நிகழ்ச்சி இன்று கோலாலம்பூர் டபுள் ட்ரீ தங்குவிடுதியில் நடைபெற்றது.

- ஃபிதா