கடுமையான மன அழுத்தத்திற்கு ஆளானதாக நம்பப்படும் மாணவன் பள்ளிக் கட்டிடத்திலிருந்து விழுந்தார்

கூலிம்:

கடந்த ஞாயிற்றுக்கிழமை, கூலிம் மாவட்டத்தில் உள்ள ஒரு இடைநிலைப் பள்ளிக் கட்டிடத்தின் மூன்றாவது மாடியிலிருந்து விழுந்ததாக நம்பப்படும் 13 வயத மாணவன் கவலைக்கிடமான நிலையில் உள்ளார்.

கூலிம் மாவட்ட போலிஸ் தலைவர்  ஷம்சுல் சின்ரிங் இதனை உறுதிப்படுத்தினார்.

இந்தச் சம்பவம் பிற்பகல் சுமார் 3.40 மணியளவில் இடைவேளையின் போது நிகழ்ந்ததாகக் கூறினார்.

பள்ளியின் 'இ' பிளோக் படிக்கட்டுகளுக்கு அருகில் தரையில் மாணவர் கிடப்பதைக் கண்டதாக 48 வயது ஆசிரியர் ஒருவரிடமிருந்து போலிசாருக்கு தகவல் கிடைத்ததாக அவர் கூறினார்.

பின்னர், புகாரளித்தவர் சம்பவ இடத்திற்குச் சென்று, பாதிக்கப்பட்ட மாணவர் சுயநினைவுடனும் பேசும் நிலையிலும் இருப்பதைக் கண்டார். 

பின்னர் அவர் கூலிம் மருத்துவமனைக்கு அவசர சிகிச்சைக்காக அழைத்துச் செல்லப்பட்டார்.

பாதிக்கப்பட்டவரிடம் போலிசார் நடத்திய விசாரணையின் முடிவுகளில், கல்வி தொடர்பான மன அழுத்தத்தால் பள்ளி கட்டிடத்தின் மூன்றாவது மாடியில் இருந்து குதித்ததாக அவர் ஒப்புக்கொண்டது தெரியவந்துள்ளது.

பாதிக்கப்பட்டவர், தனது கல்வி சாதனைகளை, அதே பள்ளியில் தற்போது நான்காம் படிவத்தில் படித்து வரும் தனது 16 வயது சகோதரியுடன் அடிக்கடி ஒப்பிட்டுப் பார்ப்பதாகக் கூறியதாகவும் அவர் தெரிவித்தார்.

- பார்த்திபன் நாகராஜன்