2027 பட்ஜெட்; செலவு அதிகரிப்புகள், தொழில் முடங்கும் அபாயத்திலிருந்து சிறு, குறு, நடுத்தர நிறுவனங்களை அரசு பாதுகாக்க வேண்டும்: முக்மின்

கோலாலம்பூர்:

வணிகத்தை அச்சுறுத்தக்கூடிய செயல்பாட்டுச் செலவுகளின் அதிகரிப்பு, விநியோகத் தடைகளிலிருந்து சிறு, குறு, நடுத்தர நிறுவனங்களைப் பாதுகாக்க, 2027 பட்ஜெட்டில் விநியோகச் சங்கிலியின் மீள்திறனுக்கு அரசாங்கம் தீவிர கவனம் செலுத்த வேண்டும்.

முக்மின் மலேசியாவின் தலைவர் டத்தோ வீரா ஷாகுல் தாவூத் இதனை வலியுறுத்தினார்.

விநியோகச் சங்கிலி நிச்சயமற்ற தன்மை என்பது இனி பெரிய நிறுவனங்கள் மட்டும் எதிர்கொள்ளும் ஒரு பிரச்சனை அல்ல, மாறாக வரையறுக்கப்பட்ட நிதித் திறன் கொண்ட சிறு வணிகர்கள் மீதும் அழுத்தத்தை ஏற்படுத்துகிறது.


மூலப்பொருட்கள், எரிசக்தி, போக்குவரத்துச் செலவுகளின் உயர்வு, தொழில்முனைவோரை நுகர்வோருக்கான பொருட்களின் விலையை உயர்த்தவோ அல்லது தங்கள் தொழில்களை மூடும் அபாயத்தை எதிர்கொள்ளவோ ​​காரணமாகலாம்.

விநியோகத் தடை அல்லது மூலப்பொருட்களின் விலையில் ஏற்படும் திடீர் உயர்வு, சிறு நிறுவனங்களின் செயல்பாடுகளை நேரடியாகப் பாதிக்கக்கூடும்.

செயல்பாட்டுச் செலவுகளில் ஏற்படும் தொடர்ச்சியான அதிகரிப்புகளைத் தாங்கிக்கொள்ள, பெரிய நிறுவனங்களைப் போன்ற நிதித் திறன் சிறு, குறு, நடுத்தர நிறுவனங்களுக்கு இல்லை என்று அவர் கூறினார்.

ஒவ்வொரு செலவு அதிகரிப்பையும் தாங்கிக்கொள்ள, பெரிய நிறுவனங்களைப் போன்ற நிதி வசதி சிறு, நடுத்தர நிறுவனங்களுக்கு இல்லை.

எனவே, விநியோகச் சங்கிலியின் மீள்திறனை ஒரு செயல்பாட்டுப் பிரச்சினையாக மட்டும் பார்க்காமல், வணிகத் தொடர்ச்சிக் கொள்கையின் ஒரு பகுதியாகப் பார்க்க வேண்டும் என்று அவர் கூறினார்.

இது தொடர்பாக, சிறு, நடுத்தர நிறுவனங்கள் மூலப்பொருட்களைப் பெறவும், கையிருப்பைப் பராமரிக்கவும், மாற்று விநியோகஸ்தர்களைக் கண்டறியவும் உதவும் வகையில், அரசாங்கம் ஒரு குறிப்பிட்ட நிதித் திட்டத்தை அறிமுகப்படுத்த வேண்டும் என்றும், அரசாங்கக் கடன் உத்தரவாதங்களை விரிவுபடுத்த வேண்டும் என்றும் அவர் பரிந்துரைத்தார்.

மேலும், இந்திய முஸ்லிம் மாற்றத்திற்கான கட்டமைப்பு 2030-இன் கீழ் உள்ள 10 பில்லியன் ரிங்கிட் கொள்முதல் இலக்கானது, பெரிய நிறுவனங்களில் மட்டும் கவனம் செலுத்தாமல், வளர்ந்து வரும் சிறு மற்றும் நடுத்தர நிறுவனங்களுக்கு உண்மையாகப் பயனளிக்க வேண்டும்.


பொருளாதார வாய்ப்புகள் பரவலாகப் பகிரப்படுவதை உறுதி செய்வதற்கும், அதன் மூலம் மேலும் பல சிறு தொழில்முனைவோர் தத்தமது வணிகங்களின் போட்டித்தன்மையை மேம்படுத்த உதவுவதற்கும் இந்த நடவடிக்கை முக்கியமானது என்று அவர் வலியுறுத்தினார்.

- பார்த்திபன் நாகராஜன்