முன்னாள் அமைச்சர், அவரது குடும்பத்தினரை வரவழைத்ததன் மூலம் எம்ஏசிசி அதிகாரத்தைத் தவறாகப் பயன்படுத்தியுள்ளது: வேதமூர்த்தி

கோலாலம்பூர்:

சொத்து அறிவிப்பு அறிவிப்பை வழங்குவதற்காக, ஒரு முன்னாள் அமைச்சரை ஆணையத்தின் தலைமையகத்திற்கு வரவழைத்ததன் மூலம் எம்ஏசிசி தனது அதிகாரத்தைத் தவறாகப் பயன்படுத்தியுள்ளது என்று வேதமூர்த்தி குற்றம் சாட்டியுள்ளார்.

அறிவிப்பை வழங்குவதற்காக ஒரு நபரின் வருகையைக் கட்டாயப்படுத்த ஆணையருக்கு எம்ஏசிசி சட்டத்தின் பிரிவு 36 அதிகாரம் அளிக்கவில்லை.

சம்பந்தப்பட்ட நபர், அறிவிப்பில் கோரப்பட்ட தகவல்களை வழங்க வேண்டும் என்று மட்டுமே பிரிவு 36 குறிப்பிடுகிறது.

தகவல் பெறுவதற்கான சட்டப்பூர்வ அதிகாரம் என்பது, மக்கள் மீது, குறிப்பாக 12 வயதுக் குழந்தை மீது தேவையற்ற அமலாக்க நடவடிக்கைகளைத் திணிப்பதற்கான உரிமம் அல்ல என்று டத்தோஸ்ரீ எம். சரவணன், அவரது குடும்பத்தினரைக் குறிப்பிட்டு அவர் ஒரு அறிக்கையில் கூறினார்.

டத்தோஸ்ரீ சரவணனின் குற்றச்சாட்டுகள் உண்மையாக இருந்து, பிரிவு 36 அறிவிப்பைப் பெறுவதற்காக மட்டுமே அவரது மகன் ஊழல் தடுப்பு ஆணையத்தின் தலைமையகத்திற்கு ஆஜராகும்படி கோரப்பட்டிருந்தால், ஊழல் தடுப்பு ஆணையம் அதன் வரம்புகளை மீறி, சட்டத்தால் வழங்கப்பட்ட அதிகாரங்களைத் தவறாகப் பயன்படுத்தியுள்ளது என்று அவர் கூறினார்.

முன்னதாக இன்று முன்னாள் மனிதவள அமைச்சர், தனது மனைவி, அவர்களது இரண்டு குழந்தைகளுடன், தங்களது சொத்துக்களை அறிவிக்கக் கோரும் அறிவிப்பைப் பெறுவதற்காக புத்ராஜயாவில் உள்ள ஊழல் தடுப்பு ஆணையத்தின் தலைமையகத்திற்கு ஆஜரானார்.

சொத்து அறிவிப்பு அறிவிப்பைப் பெறுவதற்காக தனது 12 வயது மகனை ஆணையத்தின் தலைமையகத்திற்கு வரவழைத்த ஊழல் தடுப்பு ஆணையத்தின் முடிவை டத்தோஸ்ரீ சரவணன் கேள்விக்குள்ளாக்கினார்.

குழந்தையின் தந்தை என்ற முறையில் அந்த அறிவிப்பைத் தனக்கும் வழங்கியிருக்கலாம் என்றும் அவர் வாதிட்டார்.

-  பார்த்திபன் நாகராஜன்