மறைந்த துன் டாக்டர் சித்தி ஹஸ்மாவுக்கு டத்தோஸ்ரீ அன்வாரும், வான் அஜிஸாவும் இறுதி அஞ்சலி செலுத்தினர்

சுங்கைபீசி:

பிரதமர் டத்தோஸ்ரீ அன்வார் இப்ராஹிம், அவரது மனைவி டத்தோஸ்ரீ டாக்டர் வான் அஜிஸா வான் இஸ்மாயில் ஆகியோர், மறைந்த துன் டாக்டர் சித்தி ஹஸ்மா முகமது அலிக்கு இறுதி அஞ்சலி செலுத்தினர்.

இன்று மாலை சுமார் 4 மணியளவில், இங்குள்ள தாமான் சுங்கைபீசி இந்தாவில் உள்ள அஸ் ஷரிஃப் மசூதிக்கு வருகை தந்தனர்.

முன்னாள் பிரதமர் துன் டாக்டர் மகாதீர் முகமதுவின் மனைவிக்கான இறுதி அஞ்சலித் தொழுகைக்கு முன்னதாக, அரசியல் தலைவர்கள், மூத்த அரசு அதிகாரிகள், முக்கிய பிரமுகர்கள், பொதுமக்கள் பள்ளிவாசலில் திரண்டிருந்ததைத் தொடர்ந்து இவர்களின் வருகை அமைந்தது.

பிரதமரின் அரசியல் ஆலோசகரான தெங்கு டத்தோஸ்ரீ ஜஃப்ருல் அப்துல் அஜீஸும் உடன் சென்றிருந்தார்.

முன்னதாக மதியம் 1 மணிக்கெல்லாம் மக்கள் மசூதிக்கு வரத் தொடங்கினர்.

அவர்கள் இறுதி மரியாதை செலுத்தக் கூடியதால், பள்ளிவாசல் வளாகம் முழுவதும் துக்கச் சூழல் நிலவியது என்பது குறிப்பிடத்தக்கது.

- பார்த்திபன் நாகராஜன்