உறவுகள் சுமூகமாக இல்லையென்றாலும் மடானி அரசாங்கத்தை தேசிய முன்னணி ஆதரிக்கும்: டான்ஸ்ரீ விக்னேஸ்வரன்

கோலாலம்பூர்:

உறவுகள் சுமூகமாக இல்லையென்றாலும் மடானி அரசாங்கத்தை தேசிய முன்னணி தொடர்ந்து ஆதரிக்கும்.

மஇகா தேசியத் தலைவர் டான்ஸ்ரீ எஸ்.ஏ. விக்னேஸ்வரன் இதனை கூறினார்.

15ஆவது நாடாளுமன்றம் கலைக்கும் வரை தான் ஒருமைப்பாட்டு அரசுக்கு ஆதரவு.

அதன் தேசிய முன்னணி தனது அரசியல் முடிவுகளை எடுக்கும் என்று அதன் தலைவர் டத்தோஸ்ரீ ஜாஹித் ஹமிடி நேற்று கூறினார்.

இவ்விவகாரம் குறித்து பேசிய டான்ஸ்ரீ விக்னேஸ்வரன்,

தொடக்கம் முதலே மஇகா, தேசிய முன்னணியின் நிலைப்பாடு தெளிவாக உள்ளது.

நாடாளுமன்றம் கலைக்கப்படும் வரையிலும், அடுத்த பொதுத்தேர்தல் நடைபெறும் வரையிலும் தற்போதைய ஒற்றுமை அரசாங்கத்துக்கு எங்களது ஆதரவு தொடரும்.

அடுத்த பொதுத் தேர்தலில் மஇகாவின் நிலைப்பாடு, அரசியல் கூட்டணி தொடர்பான முடிவு பின்னர் எடுக்கப்படும்.

பிரதமர் டத்தோஸ்ரீ அன்வார் இப்ராஹிம், துணைப் பிரதமர் டத்தோஸ்ரீ டாக்டர் அஹ்மத் சாஹிட் ஹமிடி ஆகியோருக்கு இடையே நல்ல புரிந்துணர்வு  உள்ளது.

ஆனால் கடந்த காலங்களைப் போன்று அனைத்தும் தற்போது சுமுகமாக இல்லை. இருந்தாலும்  இரு தரப்புக்கும் இடையே மனக்கசப்பு இல்லை.

ஆக உறவுகள் சுமூகமாக இல்லையென்றாலும் மடானி அரசாங்கத்தை தேசிய முன்னணி ஆதரிக்கும்.

மஇகா மத்திய செயலவைக் கூட்டத்திற்கு பின் நடந்த செய்தியாளர்கள் சந்திப்பில் டான்ஸ்ரீ விக்னேஸ்வரன் இவ்வாறு கூறினார்.

- பார்த்திபன் நாகராஜன்