டாக்டர் சித்தி ஹஸ்மா மறைவு: நாடு ஒரு ரத்தினத்தை இழந்து விட்டது

கோலாலம்பூர்:

புகழ்பெற்ற மருத்துவ, சமூக நலப் பிரமுகரான துன் டாக்டர் சித்தி ஹஸ்மா முகமது அலி தனது 100ஆவது வயதில் காலமானதை அடுத்து, நாடு முழுவதும் இன்று துக்கம் அனுசரிக்கப்படுகிறது.

அவரது மறைவு மலேசியாவிற்கு ஒரு பெரும் இழப்பாகும்.

கடந்த 1926ஆம் ஆண்டு ஜூலை 12 ஆம் தேதி சிலாங்கூர், கிள்ளானில் உள்ள கம்போங் ஜாவாவில் டாக்டர் சித்தி ஹஸ்மா பிறந்தார்.

சிங்கப்பூரின் ஏழாம் எட்வர்ட் மன்னர் மருத்துவக் கல்லூரியில் பட்டம் பெற்ற முதல் மலாய் பெண்களில் ஒருவராக இருந்தார்.

மேலும், 1955 ஆம் ஆண்டு மலாயா பல்கலைக்கழகத்தில் மருத்துவ பட்டம் பெற்றார்.

1956ஆம் ஆண்டு சிங்கப்பூரில் ஒன்றாகப் படிக்கும்போது சந்தித்த துன் டாக்டர் மகாதீர் முகமதுவை அவர் திருமணம் செய்துகொண்டார்.

அவர்களின் வாழ்நாள் மகிழ்ச்சியின் பொக்கிஷமாக இந்தத் தம்பதியருக்கு ஆறு குழந்தைகள் பிறந்தனர்.

தாய், குழந்தை நலத் துறையில் ஒரு முன்னோடியாக, 1974-ல் மாநில சுகாதார அதிகாரி பதவியை வகித்த முதல் பெண்மணியாக அவர் நியமிக்கப்பட்டார்.

மேலும், அவர் மிச்சிகன் பல்கலைக்கழகத்தில் பொது சுகாதாரம் குறித்துப் படித்து, குடும்ப மருத்துவம், கர்ப்பம் மற்றும் பெண்கள் நலம் குறித்து விரிவாக எழுதியுள்ளார்.

1981 ஜூலை 16 அன்று மலேசியப் பிரதமரின் மனைவியான அவர், அப்பதவியைப் பயன்படுத்தி பெண்கள் நலம், குடும்பக் கட்டுப்பாடு, வயது வந்தோர் எழுத்தறிவு, போதைப்பொருள் துஷ்பிரயோகக் கட்டுப்பாடு ஆகியவற்றை முன்னெடுத்தார்.

மலேசியாவில் பிரதமருடன் சென்ற ஒரே பெண்மணி என்பது மட்டுமின்றி, டாக்டர் சித்தி ஹஸ்மா தாய், குழந்தை நலத் துறையில் மருத்துவ அதிகாரியாக நியமிக்கப்பட்ட முதல் பெண்மணியும் ஆவார்.

மேலும், 1974-ல் மாநில தாய், குழந்தை நல அதிகாரியாக நியமிக்கப்பட்ட முதல் பெண்மணியும் இவரே.

டாக்டர் சித்தி ஹஸ்மா, மலேசியாவில் குடும்ப மருத்துவம், கர்ப்பம், பிரசவம் தொடர்பான சமூக-பொருளாதார காரணிகள் குறித்து பல கட்டுரைகளை எழுதியுள்ளார்.

அமைச்சர்கள், துணையமைச்சர்களின் மனைவியர்களுக்கான அறக்கட்டளை, நல அமைப்பின் தலைவராக, போதைப்பொருள் பயன்பாட்டிற்கு எதிரான தனது பிரச்சாரத்தில், தடைசெய்யப்பட்ட பொருட்களின் அபாயங்கள் குறித்து அவர் சமூகத்திற்கு விடாமுயற்சியுடன் கல்வி புகட்டினார்.

1985-ல், நான்சி ரீகனின் அழைப்பின் பேரில் வாஷிங்டன் டி.சி.யில் நடைபெற்ற போதைப்பொருள் பயன்பாடு குறித்த முதல் பெண்கள் மாநாட்டில் அவர் கலந்துகொண்டார்.

பின்னர், 1987-ல் வியன்னாவில் நடைபெற்ற அனைத்துலக மாநாட்டில் மலேசியாவைப் பிரதிநிதித்துவப்படுத்தினார்.

கிராமப்புறப் பெண்களின் நலனுக்காகப் போராடிய அவர், இந்தப் பிரச்சினையை உலக அளவிலும் கொண்டு சென்றார். இதில், 1992-ல் ஜெனீவாவில் நடைபெற்ற கிராமப்புறப் பெண்களின் பொருளாதார மேம்பாட்டிற்கான முதல் பெண்கள் மாநாட்டில், பெல்ஜியத்தின் ராணி ஃபாபியோலாவின் அழைப்பை ஏற்று கலந்துகொண்டதும் அடங்கும்.

அங்கு, ஆசிய பசிபிக் பிராந்தியத்திலிருந்து முக்கியக் குழு முன்னெடுப்பாளர்களில் ஒருவராக அவர் தேர்ந்தெடுக்கப்பட்டார்.

மேலும், கிராமப்புறப் பெண்கள் அதிகாரமளித்தல் கொள்கைக்கு அடிப்படையாக அமைந்த ஜெனீவா பிரகடனத்தில் கையெழுத்திட்டார்.

சரியான கல்வி, பயிற்சியின் மூலம், கிராமப்புறப் பெண்கள் எழுத்தறிவு பெற்ற மற்றும் ஆக்கப்பூர்வமான குழந்தைகளை வளர்த்து, அவர்கள் நாட்டிற்கு நேர்மறையான பங்களிப்பாளர்களாகத் திகழ முடியும் என்று டாக்டர் சித்தி ஹஸ்மா வலியுறுத்தினார்.

அமெரிக்காவின் முன்னாள் முதல் பெண்மணியான ரோசலின் கார்ட்டர், உலக மனநலக் கூட்டமைப்பின் தேசியக் குழுவில் சேருமாறு இவரை அழைத்தபோது, ​​மனநலத் துறையிலும் இவருக்கு ஒரு உத்வேகம் கிடைத்தது. அக்குழுவிற்கு கார்ட்டர் அப்போது தலைமை தாங்கினார்.

2019 ஆகஸ்ட் 22 அன்று, தேசிய மகளிர் தினத்தை முன்னிட்டு, ஆசிய வியூகம் மற்றும் தலைமைத்துவ நிறுவனத்திடமிருந்து டாக்டர் சித்தி ஹஸ்மா 'தேசத்தின் அன்னை' என்ற பட்டத்தைப் பெற்றார்.

மேலும் ஒரு அங்கீகாரமாக, படைப்புக் கலைகள் மற்றும் இசைத் துறைகளுக்கு ஆதரவளிக்கும் வகையில், ஜெஃப்ரி சீ அறக்கட்டளையால் 10 மில்லியன் ரிங்கிட் மதிப்புள்ள துன் டாக்டர் சித்தி ஹஸ்மா கல்வி உதவித்தொகை தொடங்கப்பட்டது.

கல்வித் துறையில், மல்டிமீடியா பல்கலைக்கழகத்தின் முதல் வேந்தராக நியமிக்கப்பட்ட டாக்டர் சித்தி ஹஸ்மா, யூஐடிஎம்மில் ஒரு மருத்துவப் பீடத்தை நிறுவும் யோசனையைத் தொடங்கியவர் என்றும் கூறப்படுகிறது.

அவர் நாட்டிற்குப் பெரும் பங்களிப்பு செய்த ஒரு குடும்பத்தைச் சேர்ந்தவர்.

அவரது உடன்பிறப்புகளில், ஆயுதப் படைகளின் முன்னாள் தலைமைத் தளபதி துன் முகமது ஹாஷிம், பேங்க் நெகாராவின் முன்னாள் ஆளுநர் துன் இஸ்மாயில் முகமது அலி, சிலாங்கூரின் முன்னாள் முதலமைச்சர் டான் ஸ்ரீ அஹ்மத் ரசாலி முகமது அலி ஆகியோர் அடங்குவர்.

அவரது சேவைகளையும், மென்மையான, அதிகாரமிக்க மற்றும் அன்பான ஆளுமையையும் நினைவுகூரும் சமூகத்தின் அனைத்துத் தரப்பினருக்கும் இன்று அவரது மறைவு துயரத்தை ஏற்படுத்தியுள்ளது.

டாக்டர் சித்தி ஹஸ்மா எளிமை, ஞானம், அன்பின் சின்னமாக நினைவுகூரப்படுகிறார்.

இன்று அவரது மறைவு, தேசிய வளர்ச்சி வரலாற்றில் ஒரு அழியாத மரபை விட்டுச் செல்கிறது.

- பார்த்திபன் நாகராஜன்