ONDRA RENDA -25 YEARS OF GVM : GVM-இன் ஹீரோக்கள் – ஸ்டைலுக்கும் உணர்வுக்கும் ஒரு முகம்

கோலாலம்பூர்: 

தமிழ் சினிமாவில் கதாநாயகர்களை வெறும் ஆக்‌ஷன் நாயகர்களாக மட்டுமல்லாமல், காதலிக்கவும், தோல்வியை உணரவும், வாழ்க்கையை ரசிக்கவும் தெரிந்த மனிதர்களாக திரையில் பதிவு செய்த இயக்குநர்களில் கௌதம் வாசுதேவ் மேனனுக்கு தனி இடம் உண்டு.

அவரது திரைப்படங்களில் தோன்றிய கதாநாயகர்கள், இளைஞர்களின் மனதில் ஒரு குறிப்பிட்ட பாணியையும் உணர்வையும் உருவாக்கியவர்கள்.

சூர்யா, மாதவன், சிம்பு, தனுஷ் என பல முன்னணி நட்சத்திரங்களுடன் பணியாற்றிய கௌதம் வாசுதேவ் மேனன், ஒவ்வொரு கதாநாயகனுக்கும் தனித்துவமான திரை அடையாளத்தை உருவாக்கினார்.

GVM-ன் கதாநாயகர்களின் இன்னொரு முக்கிய அம்சம் அவர்களது ஸ்டைல். உடை, நடை, பேச்சு, பார்வை என ஒவ்வொரு விஷயத்திலும் ஒரு நவீன இளைஞனின் தோற்றத்தை அவர் வடிவமைத்த விதம் தனித்துவமானது.

அதே நேரத்தில், அந்த ஸ்டைலுக்குப் பின்னால் இருக்கும் காதல், ஏக்கம், குழப்பம், பொறுப்பு, இழப்பு போன்ற உணர்வுகளையும் ரசிகர்களிடம் ஆழமாகக் கொண்டு சென்றார்.

குறிப்பாக அவரது காதல் கதைகளில் வரும் ஹீரோக்கள், காதலை வெறும் திரைப்படக் காட்சியாக காட்டாமல், வாழ்க்கையின் ஒரு பகுதியாக உணரச் செய்தனர்.

காதலியின் குரலைக் கேட்கும் தருணம் முதல், பிரிவின் வலியை எதிர்கொள்ளும் தருணம் வரை, அந்த கதாபாத்திரங்களின் உணர்வுகள் இயல்பானதாகவும் நெருக்கமானதாகவும் அமைந்தன. இதனால் GVM-ன் ஹீரோக்கள் திரையில் தோன்றிய கதாபாத்திரங்களைத் தாண்டி, ஒரு தலைமுறையின் நினைவுகளாக மாறினர்.

கௌதம் வாசுதேவ் மேனனின் 25 ஆண்டுகால திரைப்பயணத்தை நினைவுகூரும் இந்த வேளையில், அவரது ஹீரோக்களைப் பற்றி பேசுவது என்பது ஒரு சில திரைப்படங்களைப் பற்றி பேசுவது மட்டுமல்ல; ஒரு தலைமுறையின் இளமை, காதல், இசை, ஸ்டைல் மற்றும் கனவுகளை நினைவுகூர்வதாகவும் அமைகிறது.

-மவித்திரன்