அந்நியத் தொழிலாளர் ஒதுக்கீட்டில் 1.097 மில்லியன் ரிங்கிட் கையூட்டு பெற்றது தொடர்பான 3 குற்றச்சாட்டுகளை டத்தோஸ்ரீ சரவணன் மறுத்தார்

கோலாலம்பூர்:

முன்னாள் மனிதவளத்துறை அமைச்சர் டத்தோஸ்ரீ எம். சரவணன், நான்கு ஆண்டுகளுக்கு முன்பு வெளிநாட்டுத் தொழிலாளர் ஒதுக்கீடுகள் தொடர்பாக மொத்தம் 1.097 மில்லியன் ரிங்கிட் கையூட்டு பெற்றதாகக் கூறப்படும் மூன்று குற்றச்சாட்டுகளுக்கு, இங்குள்ள அமர்வு நீதிமன்றத்தில் தான் குற்றமற்றவர் என வாதிட்டார்.

நீதிபதி அசுரா அல்வி முன்னிலையில் குற்றச்சாட்டுகள் வாசிக்கப்பட்ட பின்னர், டத்தோஸ்ரீ சரவணன் இந்த வாதத்தை முன்வைத்தார்.

மனிதவள அமைச்சர் என்ற முறையில், TYKB இன்ஜினியரிங் நிறுவனத்திற்கு 1,000 வெளிநாட்டுத் தொழிலாளர்களுக்கான ஒதுக்கீட்டு விண்ணப்பத்தை அங்கீகரிக்குமாறு தூண்டுவதற்காக, வெக்டிகா ரிசோர்சஸ் நிறுவனத்தின் இயக்குநர் தான் டெக் லிம்மிடமிருந்து சைட் அமிருல் சையத் அகமது மூலம் பணம் பெற்றதாக அவர் மீது குற்றம் சாட்டப்பட்டுள்ளது.

மஇகாவின் துணைத் தலைவரான அவர், 2022 ஜூன், ஜூலை மாதத்திற்கு இடையில் மூன்று பரிவர்த்தனைகளில் இந்தப் பணத்தைப் பெற்றதாகக் கூறப்படுகிறது.

முதல் குற்றச்சாட்டின்படி, டத்தோஸ்ரீ சரவணன் 2022 ஜூன் 16ஆம் தேதி புக்கிட் ஜாலில் கோல்ஃப் & கன்ட்ரி ரிசார்ட்டில், டானிடமிருந்து சைட் அமிருல் மூலம் 150,000 ரிங்கிட் ரொக்கமாகப் பெற்றதாகக் கூறப்படுகிறது.

இரண்டாவது குற்றச்சாட்டின்படி, அவர் 2022 ஜூலை 7ஆம் தேதி பங்சாரில் உள்ள ஜாலான் தெலாவி 3-ல், டானிடமிருந்து சைட் அமிருல் மூலம் மேலும் 350,000 ரிங்கிட் ரொக்கமாகப் பெற்றதாகக் கூறப்படுகிறது.

மூன்றாவது குற்றச்சாட்டில் 597,000 ரிங்கிட் சம்பந்தப்பட்டுள்ளது.

மே பேங்க் இஸ்லாமிக் காசோலையைப் பயன்படுத்தி சைட் அமிருல் மூலம் டானிடமிருந்து பெறப்பட்டு, பிக் செவன் வென்ச்சர்ஸ் நிறுவனத்தின் மே பேங்க் இஸ்லாமிக் கணக்கில் செலுத்தப்பட்டது.

மூன்றாவது குற்றம் ஜூலை 7 அன்று ஜாலான் கிளாங் லாமாவில் உள்ள வங்கியின் கிளையில் நடந்ததாகக் கூறப்படுகிறது.

அனைத்துக் குற்றச்சாட்டுகளும் மலேசிய ஊழல் தடுப்பு ஆணையச் சட்டம் 2009-இன் பிரிவு 16(ஏ)(பி)-இன் கீழ் சுமத்தப்பட்டன, இது அதே சட்டத்தின் பிரிவு 24(1)-இன் கீழ் தண்டனைக்குரியதாகும்.

- பார்த்திபன் நாகராஜன்