ஜப்பானில் அதிதீவிர கனமழை காரணமாக 13 பேர் பலி 

தோக்கியோ: 

ஜப்பானின் கிழக்கே தோக்கியோவில் உள்ள சிபா மாகாணத்தில் கடந்த வாரம் வரலாறு காணாத கனமழை பெய்தது. 

இந்த பலத்த மழை காரணமாக 13 பேர் உயிரிழந்ததாக உள்ளூர் அதிகாரிகள் உறுதிப்படுத்தினர். 

மேலும் வெள்ளத்தில் அடித்துச் செல்லப்பட்ட ஒருவரைக் கண்டுபிடிக்கும் தேடுதல் பணியில் மீட்புக் குழுவினர் தொடர்ந்து ஈடுபட்டு வருகின்றனர்.

இப்பகுதியில் பெய்த கனமழையின் காரணமாக மூன்று வீடுகள் முற்றிலுமாக அழிந்தன, மேலும் 66 வீடுகள் பலத்த சேதமடைந்தன.

இதனுடன் 1,105 வீடுகளுக்குள் வெள்ளநீர் புகுந்ததுடன், 1,209 வீடுகளைச் சுற்றி நீர் சூழ்ந்து மக்கள் வாழ்வாதாரம் பாதிக்கப்பட்டது.

பாதிக்கப்பட்ட பகுதிகளில் செவ்வாய்க்கிழமை பிற்பகல் நிலவரப்படி 63 நபர்கள் இன்னும் அரசு அமைத்துள்ள நிவாரண முகாம்களில் தங்கியுள்ளனர்.

அதேவேளையில் வெள்ள நீரில் மூழ்கியதால் சாலைகளில் சிக்கித் தவிக்கும் சுமார் 2,500 வாகனங்களை அப்புறப்படுத்தும் பணிகள் தீவிரமாக நடைபெற்று வருகின்றன.

சாலைகளில் கைவிடப்பட்ட வாகனங்களை விரைவாக நிர்வகிக்கவும் அகற்றவும் செவ்வாய்க்கிழமை அன்று ஒரு சிறப்புப் பணிக்குழு அதிகாரிகளால் உருவாக்கப்பட்டது. 

ஒட்டுமொத்தமாக சிபா மாகாணத்தில் பெய்த கனமழை மற்றும் வெள்ளம் மிகப்பெரிய அளவிலான மனித மற்றும் சொத்து இழப்புகளை ஏற்படுத்தியுள்ளது.

தற்போது நிவாரணப் பணிகளுடன் சேர்த்து மீட்பு மற்றும் சீரமைப்பு நடவடிக்கைகள் அங்கு முழு வீச்சில் நடைபெற்று வருகின்றன.

-மவித்திரன்