உங்கள் ஒவ்வொரு அசைவும் இயந்திரங்களால் கண்காணிக்கப்படும்போது... வெள்ளிச்சிந்தனை 

உங்கள் ஒவ்வொரு அசைவும் இயந்திரங்களால் கண்காணிக்கப்படும் ஒரு நகரத்தில் நீங்கள் நடந்து செல்வதை கற்பனை செய்து பாருங்கள்.

சீனா முழுவதும் ஸ்கைநெட் (Skynet) எனப்படும் பிரம்மாண்டமான செயற்கை நுண்ணறிவு (AI) அடிப்படையிலான கண்காணிப்பு வலையமைப்பு; தெருக்கள், ரயில் நிலையங்கள், பள்ளிகள், வணிக வளாகங்கள், நெடுஞ்சாலைகள் மற்றும் தொலைதூர கிராமங்களைக் கூட கண்காணிக்கிறது.

இதுவரை உருவாக்கப்பட்ட கண்காணிப்பு அமைப்புகளில் இது மிகவும் விரிவானது. இதற்காக லட்சக்கணக்கான கேமராக்கள் பயன்படுத்தப்படுகின்றன.

முக அம்சங்கள், ஆடையின் நிறம், நடை, ஓட்டும் வாகனத்தின் தயாரிப்பு மற்றும் மாடல் ஆகியவற்றின் அடிப்படையில் சில நொடிகளில் தனிநபர்களை அதனால் அடையாளம் காண முடியும்.

சில பகுதிகளில், இந்த செயற்கை நுண்ணறிவு (AI) நடத்தை முறைகளை பகுப்பாய்வு செய்து, அசாதாரணமான செயல்பாடுகளைக் கண்டறிந்து, தானாகவே அதிகாரிகளுக்கு எச்சரிக்கை செய்கிறது.

இந்த அமைப்பு பொதுப் பாதுகாப்பில் ஒரு புரட்சியை ஏற்படுத்தியுள்ளது என்று இதன் ஆதரவாளர்கள் வாதிடுகின்றனர்.
குற்றவாளிகளை விரைவாகக் கைது செய்யவும், காணாமல் போனவர்களை சில மணி நேரங்களில் கண்டுபிடிக்கவும், அச்சுறுத்தல்களைத் தடுக்கவும் இது உதவுகிறது.

ஆனால் விமர்சகர்கள் இதை முற்றிலும் மாறுபட்ட ஒன்றாகப் பார்க்கிறார்கள்.

தனிமை மறைந்து, ஒவ்வொரு அசைவும் பதிவு செய்யப்பட்டு சேமிக்கப்படும் ஒரு எதிர்காலம் இதோ வந்துவிட்டது. இனி கண்காணிப்பிலிருந்து தப்பிப்பது சாத்தியமற்றதாகிவிடும்.

ஆனால் ஓர் உண்மை முஸ்லிம் இது குறித்தெல்லாம் கவலைப்பட மாட்டான் ஏனெனில், அல்லாஹ் எப்போதும் தன்னைக் கண்காணிக்கிறான் என்ற சிந்தனையில்தான் அவன் அன்றாட வாழ்வை நகர்த்துகிறான்.

அல்லாஹ் கூறுகிறான்:
"நீங்கள் செய்துவந்த செயல்கள் அனைத்தையும் நாம் பதிவு செய்துகொண்டிருந்தோம்”.
(45:29)

- நூஹ் மஹ்ழரி