கனடாவிலிருந்து இறக்குமதி செய்யப்படும் பல்வேறு பொருட்களுக்கு 50 விழுக்காடு அமெரிக்கா புதிய வரி விதிப்பு: அமெரிக்கா அதிபர் டிரம்ப் கையெழுத்து

வாஷிங்டன்: 

கனடாவிலிருந்து இறக்குமதி செய்யப்படும் பல்வேறு பொருட்களுக்கு 50 விழுக்காடு புதிய சுங்கவரியை விதிப்பதற்கான அதிகாரப்பூர்வ உத்தரவில் அமெரிக்க அதிபர் டொனால்ட் டிரம்ப் கையெழுத்திட்டுள்ளார்

கனடா நாட்டு அரசாங்கம் அமெரிக்காவின் மதுபானங்கள், மோட்டார் வாகனங்கள் மற்றும் பால் சார்ந்த பொருட்களுக்கு எதிராக பாகுபாடான அணுகுமுறையை கொண்டிருந்த நிலையில் அதற்கு பதிலடியாக அமெரிக்கா இந்த நடவடிக்கையை மேற்கொண்டுள்ளது. 

இந்த புதிய சுங்கவரி அறிவிப்பு வெளியிடப்பட்ட 30 நாட்களுக்குள் அமலுக்கு வரும். இதில் மதுபானங்கள், ஹாக்கி மட்டைகள் மற்றும் சிமெண்ட் உள்ளிட்ட பலதரப்பட்ட நுகர்வோர் பொருட்கள் அடங்கும்.

இதுவரை பரிசோதிக்கப்படாத 1930-ஆம் ஆண்டின் சுங்கவரிச் சட்டத்தின் பிரிவு 338-ஐ பயன்படுத்தி இந்நடவடிக்கை எடுக்கப்பட்டுள்ளது.

கனடாவின் நியாயமற்ற வர்த்தக நடைமுறைகளுக்கும் அமெரிக்கப் பொருட்களுக்கு எதிரான புறக்கணிப்புகளுக்கும் அந்நாட்டைப் பொறுப்பேற்கச் செய்வதே இந்த அறிவிப்பின் முதன்மை நோக்கம் என்று அமெரிக்காவின் வர்த்தக பிரதிநிதி ஜேமிசன் கிரீயர் கூறினார்.

-மவித்திரன்