BREAKING NEWS: Nvidia CEO சீன நிர்வாகியுடன் கள்ளத் தொடர்பு: ஒப்புக்கொண்டார் ஜென்சன் ஹுவாங்

கலிபோர்னியா:

உலக AI புரட்சிக்கு சக்தி கொடுக்கும் சிப்களை தயாரிக்கும் என்விடியாவின் தலைவர் ஜென்சன் ஹுவாங், சீன நிர்வாகி ஒருவருடன் கள்ளத் தொடர்பு வைத்திருந்ததை ஒப்புக்கொண்டுள்ளார். அந்த பெண் பெய்ஜிங்குக்காக வேலை செய்ததாக அமெரிக்க உளவுத்துறை நம்புவதாக கூறப்படுகிறது.

என்ன நடந்தது?

63 வயதான ஹுவாங், ஞாயிற்றுக்கிழமை என்விடியா ஊழியர்களுக்கு அனுப்பிய செய்தியில் இந்த தொடர்பை ஒப்புக்கொண்டார்.

“நான் என் மனைவிக்கு துரோகம் செய்துவிட்டேன். என் செயல்கள் அவரையும், எங்கள் குழந்தைகளையும் காயப்படுத்திவிட்டன. நான் செய்ததற்கு எந்த சாக்குப்போக்கும் இல்லை. மிகவும் வருந்துகிறேன்” என அவர் எழுதியுள்ளார்.

ஹுவாங் 1985-ஆம் ஆண்டு முதல் தனது மனைவி லோரி உடன் திருமண வாழ்க்கையில் உள்ளார்.

அமெரிக்க உளவுத்துறை அதிகாரிகள், அந்த பெண் ஆலிஸ் ஹுவாங் சீனாவுக்கு தகவல் கொடுத்து வந்ததாக முடிவு செய்துள்ளனர் என நியூயார்க் டைம்ஸ் செய்தி வெளியான பிறகு இந்த ஒப்புதல் வந்துள்ளது. 

ஆலிஸ் ஹுவாங்குக்கும் என்விடியா தலைவருக்கும் உறவுமுறை இல்லை. முன்பு என்விடியா, அவருடனான தொடர்புகள் வணிக தொடர்புகளை வைத்து பார்த்தால் “வழக்கத்துக்கு மாறானது அல்ல, எதிர்பாராதது அல்ல” என கூறியிருந்தது.

ஆலிஸ் ஹுவாங் யார்?

ஆலிஸ் ஹுவாங், ஹுவாங் லே என்றும் அழைக்கப்படுகிறார். அவர் மெகாஸ்பீட் நிறுவனத்தில் மூத்த நிர்வாகியாக இருந்தார். சிங்கப்பூரை தளமாக கொண்ட டேட்டா சென்டர் நிறுவனம் இது. இது 2023-இல் ஒரு சீன நிறுவனத்தில் இருந்து பிரிந்து வந்தது. 

என்விடியா சிப்களில் இருந்து கணினி சக்தியை வாடகைக்கு விடுகிறது.

வால் ஸ்ட்ரீட் ஜர்னல் செய்திப்படி, அவரும் ஹுவாங்கும் 2024, 2025-ஆம் ஆண்டுகளில் தைபேயில் ஒன்றாக புகைப்படம் எடுக்கப்பட்டனர். 

2025 மே 22-ஆம் தேதி தைபேயில் கம்ப்யூடெக்ஸ் கண்காட்சியின் போது ஜென்சன் ஹுவாங் நடத்திய இரவு உணவில் ஆலிஸ் ஹுவாங் கலந்து கொண்டார்.

இந்த ஆண்டு வசந்த காலத்தில் அமெரிக்க மூத்த அதிகாரிகளிடையே சுற்றிய குறிப்பு ஒன்றில், அவர் சீனாவின் அரசு பாதுகாப்பு அமைச்சகத்தின் சொத்து என உளவுத்துறை தகவல் கூறியதாக டைம்ஸ் செய்தி கூறுகிறது.

ஹுவாங் குறித்து தகவல் சேகரிக்க, என்விடியாவின் சிறந்த சிப்களை சீனாவில் விற்க வலியுறுத்தும் பக்கம் என்விடியாவை திருப்ப, அவர் நியமிக்கப்பட்டிருக்கலாம் என அந்த குறிப்பு கூறியது.

அவருக்கும் ஹுவாங்குக்கும் இடையிலான நெருக்கத்தை அறிந்த பிறகு, சிங்கப்பூர், தைவான் அதிகாரிகளும் சீன உளவுத்துறை அவரை நியமித்திருக்கலாம் என சந்தேகித்ததாக ஜர்னல் கூறியுள்ளது. 

அவர் தற்போது எங்கு உள்ளார் என்பது தெளிவாக தெரியவில்லை.மெகாஸ்பீட் மீது சந்தேகம்தடை செய்யப்பட்ட சிப்களை சீனாவுக்கு கடத்த உதவியதாக மெகாஸ்பீட் மீது அமெரிக்க அதிகாரிகள் சந்தேகிக்கின்றனர். 

இந்த நிறுவனம் குறித்த கூட்டாட்சி விசாரணையை நீதித்துறை எடுத்துள்ளது. அமெரிக்காவில் சீனாவுக்கு மேம்பட்ட சிப்களை ஏற்றுமதி செய்வதில் 2022-இல் கடும் கட்டுப்பாடுகள் விதிக்கப்பட்ட ஐந்து மாதங்களுக்கு பிறகு, ஆலிஸ் ஹுவாங் மெகாஸ்பீட் நிறுவனத்தை கட்டுப்பாட்டுக்கு கொண்டு வந்தார்.

சீனா மறுப்பு

பெய்ஜிங் இந்த குற்றச்சாட்டுகளை நிராகரித்துள்ளது. வெளியுறவு அமைச்சக செய்தி தொடர்பாளர் குவோ ஜியாகுன் திங்களன்று, “சீன உளவாளி என்ற கதை முற்றிலும் ஆதாரமற்ற அவதூறு, இழிவுபடுத்துதல்” என கூறியுள்ளார்.

ஏன் இது முக்கியம்?

AI மாடல்களை பயிற்றுவிக்க, இயக்க பயன்படும் சிப்களில் சுமார் 90% சந்தையை என்விடியா கட்டுப்படுத்துகிறது.

ஜர்னல் செய்திப்படி, ஹுவாங் சீனாவுக்கு சிப் ஏற்றுமதியை அனுமதிக்க வெள்ளை மாளிகையிடம் வலியுறுத்தி வந்தபோது, உளவுத்துறை அதிகாரிகள் இந்த தொடர்பு குறித்து சந்தேகித்தனர்.

டைம்ஸ் செய்திப்படி, டிரம்ப் இந்த உளவுத்துறை தகவல் குறித்து சுமார் ஒரு ஆண்டுக்கு முன்பு தெரிவிக்கப்பட்டார். அவர் அதன் மீது நடவடிக்கை எடுக்கவில்லை.

டிரம்ப் ஞாயிற்றுக்கிழமை, இந்த குற்றச்சாட்டுகள் குறித்து ஹுவாங்கிடம் பேசவில்லை என்றும், அவர் ஒரு நல்ல நபர் என்றும் கூறியுள்ளார்.

போர்டு என்ன செய்கிறது?

என்விடியா போர்டு ஞாயிற்றுக்கிழமை இது குறித்து சுயாதீன விசாரணையை தொடங்கியுள்ளது.“தேசிய பாதுகாப்போ, என்விடியா ரகசியங்களோ பாதிக்கப்பட்டதாக நம்புவதற்கு போர்டுக்கு காரணம் இல்லை. ஆனால், போர்டின் விசாரணை கிடைக்கும் அனைத்து தகவல்களையும் ஆராயும்” என அது கூறியுள்ளது.

சுயாதீன இயக்குனர்கள் கொண்ட குழு, வெளிப்புற வழக்கறிஞர்களுடன் இணைந்து இந்த மதிப்பாய்வை நடத்தும்.ஹுவாங் இந்த மதிப்பாய்வை முழுமையாக ஆதரிப்பதாகவும், ஒத்துழைக்க உறுதியளித்துள்ளதாகவும் போர்டு கூறியுள்ளது.இந்த செய்திக்கு பிறகு என்விடியா பங்கு விலை 4%-க்கு மேல் சரிந்துள்ளது. 

- ஃபிதா