அமெரிக்கா மீண்டும் தனியாக FIFA உலகக் கிண்ணத்தை ஏற்று நடத்த வேண்டும்: அதிபர் டொனால்ட் டிரம்ப் விருப்பம்

நியூயார்க்-

அமெரிக்கா மீண்டும் ஒரு உலகக் கோப்பையைத் தனியாக நடத்த வேண்டும் என்ற தனது விருப்பத்தை அமெரிக்க அதிபர் டொனால்ட் டிரம்ப் வெளிப்படுத்தியுள்ளார்.

இம்முறை கனடா மற்றும் மெக்சிகோவை தவிர்த்துவிட்டு அமெரிக்காவை மட்டுமே உலகக் கோப்பையை நடத்த FIFA தேர்ந்தெடுக்க வேண்டும் என்று கேட்டுக்கொண்டார்.

 2038-ஆம் ஆண்டிற்கான உலகக் கோப்பையை அமெரிக்காவும் சீனாவும் இணைந்து நடத்துவது குறித்து FIFA தலைவர் ஜியானி இன்ஃபான்டினோ தன்னிடம் பேசியதாக டிரம்ப் குறிப்பிட்டுள்ளார்.

ஸ்பெயின் மற்றும் அர்ஜென்டினா அணிகளுக்கு இடையிலான இறுதிப் போட்டியில் பங்கேற்கவுள்ள டிரம்ப், போஸ்னியா அணிக்கு எதிரான ஆட்டத்தில் அமெரிக்க வீரர் ஃபோலரின் பலோகன் பெற்ற சிவப்பு அட்டையை ரத்து செய்யுமாறு இன்ஃபான்டினோவை வலியுறுத்தியதாகக் கூறி சர்ச்சையை ஏற்படுத்தியுள்ளார்.

டிரம்பின் தலையீட்டால் FIFA அமைப்பு சர்ச்சைக்குரிய வகையில் பலோகனின் தடையை நீக்கிய போதிலும், பெல்ஜியம் அணிக்கு எதிரான அடுத்த சுற்றில் அமெரிக்கா 4-1 என்ற கணக்கில் தோல்வியடைந்து கால் இறுதிக்கு முன்னேறும் வாய்ப்பை இழந்தது.

2026 FIFA உலகக் கிண்ண காற்பந்து போட்டியின் இறுதியாட்டம் எதிர்வரும் ஜூலை 19ஆம் தேதி நடைபெறவுள்ளது. இவ்வாட்டம் நியூயார்க் நகரில் உள்ள மெட்லைஃப் ஸ்டேடியத்தில் நடைபெறவுள்ளது.

-மவித்திரன்