பழங்களை பழுக்க வைக்க கால்சியம் கார்பைட் பயன்படுத்தப்படுகிறது; இது மெல்லக் கொல்லும் விஷம்: பினாங்கு பயனீட்டாளர் சங்கம் எச்சரிக்கை

பினாங்கு:

மலேசியாவில் பழங்களைப் பழுக்க வைக்கும் ஒரு  பொருளாக கால்சியம் கார்பைட் பயன்படுத்தப்படுகிறது.

இதற்கு உடனடியாக தடை விதிக்கப்பட வேண்டும் என  பினாங்கு பயனீட்டாளர் சங்கம் சம்பந்தப்பட்ட அதிகாரிகளை கேட்டுக்கொண்டுள்ளது.

கால்சியம் கார்பைடு என்பது ஒரு தொழில்துறை இரசாயனமாகும் என்கிறார் அதன் தலைவர் முஹைதீன் அப்துல் காதர்.

இந்த கால்சியம் கார்பைட் ஈரப்பதத்துடன் தொடர்பு கொள்ளும்போது அசிட்டிலீன் வாயுவை வெளியிடுகிறது. 

இந்த வாயு, பழங்களைப் பழுக்க வைக்கும் இயற்கையான ஹார்மோனான எத்திலீனைப் போலவே செயல்படுகிறது. 

இருப்பினும், இது ஆர்சனிக், பாஸ்பரஸ் போன்ற நச்சுச் சேர்மங்களையும் வெளியிடுகிறது என்றார் முஹைதீன்.

கால்சியம் கார்பைடின் பயன்பாடு பயனீட்டாளருக்கு நச்சுத்தன்மை வாய்ந்தது மட்டுமல்லாமல், அதைக் கையாளுபவர்களுக்கும் தீங்கு விளைவிக்கக்கூடும்.இது நரம்பு மண்டலத்தைப் பாதிக்கிறது.

இதன் விளைவாக, குறுகிய காலத்தில் தலைவலி, தலைச்சுற்றல், மனநிலை மாற்றங்கள், தூக்கக் கலக்கம், மனக்குழப்பம், வலிப்பு போன்றவை ஏற்படுகின்றன.

அதே சமயம், நீண்ட காலத்தில் இது நினைவாற்றல் இழப்பு, மூளை வீக்கத்தை ஏற்படுத்தக்கூடும்.

பினாங்கு, கப்பாளா பத்தாஸில்  உள்ள பல பழ வியாபாரிகளிடம் பி.ப.சங்கம் தொடர்பு கொண்டது. 

அவர்கள் வாழைப்பழங்கள், மாம்பழங்கள், அன்னாசிப்பழங்கள்,பப்பாளி உள்ளிட்ட சில பழங்களைப் பழுக்க வைக்க கால்சியம் கார்பைடைப் பயன்படுத்துவதாகக் கூறினர்.

மேலும், அவர்கள் மற்ற வியாபாரிகளுக்கும் கால்சியம் கார்பைடை விற்பதாகத் தெரிவித்தனர்.

ஷோப்பி, லசாடா போன்ற முக்கிய மின் வணிகத் தளங்களும் இந்த இரசாயனத்தை விற்பனை செய்கின்றன என்றார் முஹைதீன்.

செயற்கையாகப் பழுக்க வைக்க கால்சியம் கார்பைட் பயன்படுத்தப்படும்போது, ​​பழத்தில் உள்ள ஈரப்பதம் காரணமாக ஒரு வேதியியல் வினை நிகழ்கிறது.

 வெப்பமும் அசிட்டிலீன் வாயுவும் உருவாகி, பழுக்கும் செயல்முறை வேகப்படுத்தப்படுகிறது.

 இருப்பினும், கால்சியம் கார்பைட் மூலம் பழுக்க வைக்கப்பட்ட பழங்கள் மென்மையாகவும் கவர்ச்சிகரமான தோல் நிறத்துடனும் காணப்பட்டாலும், அவை பெரும்பாலும் சுவை குறைவாகவும், குறுகிய ஆயுட்காலத்தைக் கொண்டவையாகவும் இருக்கின்றன.

 செயற்கையாகப் பழுக்க வைக்கப்பட்ட ஒரு வாழைப்பழத்தின் வெளித்தோல் மஞ்சள் நிறத்தில் இருக்கலாம், ஆனால் உள்ளே இருக்கும் சதை பழுக்காமலும் பச்சை நிறத்திலும் இருக்கும்.
 நச்சுத்தன்மையுடன் இருப்பதுடன், செயற்கையாகப் பழுக்க வைக்கப்பட்ட பழங்கள் குறைந்த ஊட்டச்சத்து கொண்டவையாக உள்ளன.

வேளாண்மை, உணவுப் பாதுகாப்பு அமைச்சு, விவசாய உற்பத்தித்திறனை மேம்படுத்துவதில் மட்டும் கவனம் செலுத்தாமல், மிக முக்கியமாக பாதுகாப்பான, ஆரோக்கியமான உணவு உற்பத்தியை உறுதி செய்ய வேண்டும்.

மலேசியா ஏற்கனவே பல்வேறு புற்றுநோய்கள், நாள்பட்ட நோய்களின் அதிகரித்து வரும் சுமையை எதிர்கொண்டு வருகிறது.

கால்சியம் கார்பைடைப் பயன்படுத்தி செயற்கையாகப் பழுக்க வைக்கப்பட்ட பழங்களின் தீங்கு விளைவிக்கும் தாக்கங்களைக் கருத்தில் கொண்டு, அதன் பயன்பாட்டிற்கு உடனடியாகத் தடை விதிக்க வேண்டும் என்று சுகாதார அமைச்சையும் வேளாண்மை, உணவுப் பாதுகாப்பு அமைச்சையும் பி.ப.சங்கம் வலியுறுத்துகிறது.

மாம்பழம், பப்பாளிப் பழங்களை உண்ணும்போது, ​​வெட்டிச் சாப்பிடுவதற்கு முன்பு எப்போதும் தோலை அகற்ற வேண்டும்.

ஏனெனில் அதன் வெளிப்புறப் பரப்பில்தான் அதிக அளவு இரசாயனங்கள் செறிந்துள்ளன.

உணவுப் பாதுகாப்பைப் பேணுவதற்கும்,  பயனீட்டாளரின் மேசைக்கு வரும் உணவு சத்தானதாகவும் தீங்கு விளைவிக்கும் இரசாயனங்கள் அற்றதாகவும் இருப்பதை உறுதி செய்வதற்கும், வலுவான ஒழுங்குமுறை அமலாக்கமும் பயனீட்டாளர் விழிப்புணர்வும் அவசரமாகத் தேவைப்படுகின்றன என்றார் முஹைதீன் அப்துல் காதர்.

- ஃபிதா