பாஸ், பெர்சத்து இடையிலான பிளவு; டத்தோஸ்ரீ அன்வாரின் கீழ் ஒரு நிலையான தலைமைக்கான தேவையை எடுத்துக் காட்டுகிறது: குணராஜ்

செந்தோசா:

பாஸ், பெர்சத்து  இடையிலான பிளவு;  டத்தோஸ்ரீ அன்வாரின் கீழ் ஒரு நிலையான தலைமைக்கான தேவையை எடுத்துக் காட்டுகிறது.

செந்தோசா சட்டமன்ற உறுப்பினர் டாக்டர் குணராஜ் இதனை கூறினார்.

பெர்சத்துவுடனான தனது ஒத்துழைப்பை முடிவுக்குக் கொண்டுவர பாஸ் எடுத்த சமீபத்திய முடிவு, மலேசியாவின் அரசியல் களத்தில் ஒரு குறிப்பிடத்தக்க வளர்ச்சியைக் குறிக்கிறது.

நாடு 16ஆவது பொதுத் தேர்தலை நெருங்கி வரும் வேளையில், இந்த பிளவு எதிர்க்கட்சி கூட்டணியின் எதிர்கால திசை, ஒற்றுமை, நிலைத்தன்மை குறித்து முக்கியமான கேள்விகளை எழுப்புகிறது.

நெகிரி செம்பிலான் நம்பிக்கை கூட்டணியின் தேர்தல் கேந்திர தொடங்கப்பட்ட பிறகு செய்தியாளர்களிடம் குணராஜ் ஜோர்ஜ்,

அரசியல் நிச்சயமற்ற தன்மை அதிகரித்து வரும் இக்காலத்தில், மலேசியாவிற்கு ஸ்திரத்தன்மை, தொடர்ச்சி, தெளிவான வழிகாட்டுதலை வழங்கக்கூடிய ஒரு தலைவர் தேவை என்று கூறினார்.

பிரதமர் டத்தோஸ்ரீ அன்வார் இப்ராஹிம், அரசியல் நிலைத்தன்மையை பேணி, மலேசியா மடானி செயல்திட்டத்தின் கீழ் அர்த்தமுள்ள சீர்திருத்தங்களை முன்னெடுத்துச் செல்கிறார்.

அதே வேளையில், ஒரு பன்முகத்தன்மை வாய்ந்த ஒற்றுமை அரசாங்கத்தை வழிநடத்தும் தனது திறனை வெளிப்படுத்தியுள்ளார்.

நவம்பர் 2022இல் பதவியேற்றதிலிருந்து, அன்வாரின் நிர்வாகம் கடுமையான வறுமையை ஒழிப்பது, ஆளுகையை வலுப்படுத்துவது, வெளிநாட்டு முதலீடுகளை ஈர்ப்பது, மலேசியாவின் அனைத்துலக அந்தஸ்தை உயர்த்துவது ஆகியவற்றை நோக்கமாகக் கொண்ட பல்வேறு முன்னெடுப்புகளைச் செயல்படுத்தியுள்ளது.

இந்தச் சாதனைகள் நாட்டின் நிறுவனங்கள், பொருளாதாரம் மீதான நம்பிக்கையை மீட்டெடுக்க உதவியுள்ளன.

அரசியல் பிளவுகளும் நிலைத்தன்மையின்மையும் தேசிய முன்னேற்றத்தைத் தடுக்கக்கூடும் என்பதற்கு பாஸ், பெர்சத்து பிளவு ஒரு நினைவூட்டலாக அமைகிறது.

உள்நாட்டு அரசியல் தகராறுகள், தலைமைத்துவ நிச்சயமற்ற தன்மைகளால் திசைதிருப்பப்படுவதற்குப் பதிலாக, பொருளாதார வளர்ச்சி, வேலைவாய்ப்பு உருவாக்கம், முதலீடு மற்றும் அனைத்துக் குடிமக்களின் வாழ்க்கைத் தரத்தை மேம்படுத்துவதில் கவனம் செலுத்தும் ஒரு அரசாங்கத்தையே மலேசியர்கள் பெறத் தகுதியானவர்கள் என்று அவர் கூறினார்.

- பார்த்திபன் நாகராஜன்