85 ரிங்கிட் கமிஷனுக்கு ஆசைப்பட்டு இறுதியில் பெரிய தொகை பறிபோனது: இணைய வேலை மோசடியில் சிக்கிய இல்லத்தரசிக்குப் பெரும் அதிர்ச்சி

கோலா திரெங்கானு: 

சமூக ஊடகங்களில் விளம்பரப்படுத்தப்பட்ட “எளிதான வருமானம் தரும் பகுதி நேர வேலை” என்ற கவர்ச்சிகரமான வாக்குறுதியை நம்பிய 37 வயதுடைய இல்லத்தரசி ஒருவர், 95,715 ரிங்கிட் பணத்தை இழந்த சம்பவம் பெரும் அதிர்ச்சியை ஏற்படுத்தியுள்ளது. ஆரம்பத்தில் வெறும் 85 ரிங்கிட் கமிஷன் வழங்கப்பட்டதன் மூலம் நம்பிக்கை பெற்ற அவர், பின்னர் திட்டமிட்ட இணைய மோசடிக்குப் பலியாகியுள்ளார்.

கோலா திரெங்கானு காவல்துறைத் தலைவர் உதவி ஆணையர் அஸ்லி முஹம்மத் நூர், பாதிக்கப்பட்ட பெண் கடந்த மே 8ஆம் தேதி பேஸ்புக்கில் வெளியிடப்பட்டிருந்த வேலைவாய்ப்பு விளம்பரத்தைப் பார்த்து அதில் உள்ள இணைப்பை அழுத்தியதாகத் தெரிவித்தார். அதனைத் தொடர்ந்து, வாட்ஸ்அப் வழியாக அடையாளம் தெரியாத நபருடன் தொடர்பு ஏற்படுத்தப்பட்டு, அதிக வருமானம் தரும் பகுதி நேர வேலை வழங்கப்படுவதாக கூறப்பட்டுள்ளது.

அதன்பின்னர், அவர் ஒரு டெலிகிராம் குழுவில் சேர்க்கப்பட்டார். அங்கு எளிமையான பணிகள் வழங்கப்பட்டதுடன், முதல் இரண்டு பணிகளை நிறைவேற்றியதற்காக 85 ரிங்கிட் ‘கமிஷன்’ பணம் வழங்கப்பட்டது. இந்த ஆரம்பக் கொடுப்பனவு, பாதிக்கப்பட்டவரின் நம்பிக்கையை அதிகரித்து, மோசடியாளர்களின் அடுத்த கட்ட திட்டத்திற்கு வழிவகுத்தது.

சிறிய தொகை கிடைத்த மகிழ்ச்சியில் தொடர்ந்து வழங்கப்பட்ட அறிவுறுத்தல்களைப் பின்பற்றிய அவர், மே 8 முதல் மே 18 வரை ஏழு வெவ்வேறு வங்கிக் கணக்குகளுக்கு மொத்தம் ஏழு பரிவர்த்தனைகள் மூலம் பெரிய அளவிலான தொகைகளை அனுப்பியுள்ளார். ஆனால், அதன் பின்னர் எந்த வருமானமும் கிடைக்காத நிலையில், மோசடி வலையில் சிக்கியிருப்பதை அவர் உணரத் தொடங்கினார்.

இந்த மோசடி திட்டத்துடன் தொடர்புடைய மற்றவர்களுடன் பேசிய பின்னரே, தான் ஏமாற்றப்பட்டிருப்பதை அவர் முழுமையாக உணர்ந்ததாக காவல்துறை தெரிவித்துள்ளது. மேலும், இழந்த பணத்தில் தனது கணவருடன் இணைந்து சேமித்து வைத்திருந்த குடும்ப சேமிப்புத் தொகையும் அடங்குவதாக அதிகாரிகள் கூறியுள்ளனர்.

இந்தச் சம்பவம் தொடர்பாக தண்டனைச் சட்டம் பிரிவு 420-இன் கீழ் விசாரணை முன்னெடுக்கப்பட்டு வருகிறது. குற்றம் நிரூபிக்கப்பட்டால், குற்றவாளிகளுக்கு ஓராண்டு முதல் 10 ஆண்டுகள் வரை சிறைத்தண்டனை, அபராதம், பிரம்படி விதிக்கப்படலாம். இதுபோன்ற “எளிதில் பணம் சம்பாதிக்கலாம்” என்ற இணைய வேலைவாய்ப்பு விளம்பரங்கள் குறித்து பொதுமக்கள் மிகுந்த எச்சரிக்கையுடன் இருக்குமாறு காவல்துறை மீண்டும் வலியுறுத்தியுள்ளது.

-சங்கீர்த்தனா