இரு மாணவர்களிடம் பாலியல் துஷ்பிரயோகம்?: ஆசிரியர் மீது 7 குற்றச்சாட்டுகள்

செத்தியூ: 

இரண்டு ஆண் மாணவர்களிடம் பாலியல் துஷ்பிரயோகத்தில் ஈடுபட்டதாக முன்வைக்கப்பட்ட ஏழு குற்றச்சாட்டுகளை 42 வயதுடைய ஆசிரியர் ஒருவர் நீதிமன்றத்தில் மறுத்துள்ளார்.

குற்றஞ்சாட்டப்பட்ட ஆசிரியர் 17, 15 வயதுடைய இரு மாணவர்களுடன் தொடர்புடைய பாலியல் துஷ்பிரயோக குற்றச்சாட்டுகளை எதிர்கொண்டு வருகிறார். அவர்மீது, வாட்ஸ்அப் வழியாக மாணவரைப் பாலியல் நோக்கத்துடன் தொடர்புகொண்டதாகவும், பின்னர் உடல் ரீதியான துஷ்பிரயோகத்தில் ஈடுபட்டதாகவும் குற்றம் சுமத்தப்பட்டுள்ளது.

இந்தச் சம்பவங்கள் கடந்த மே மாதத்தில் பெசுட், கோலா திரெங்கானு பகுதிகளில் இடம்பெற்றதாக விசாரணையில் தெரிவிக்கப்பட்டுள்ளது.

அனைத்து குற்றச்சாட்டுகளையும் மறுத்த ஆசிரியருக்கு, 22,000 ரிங்கிட் ஜாமீன் வழங்கிய நீதிமன்றம், மாதந்தோறும் காவல் நிலையத்தில் ஆஜராக வேண்டும், வழக்குச் சாட்சிகளைத் தொடர்புகொள்ளக் கூடாது என்ற கடுமையான நிபந்தனைகளையும் விதித்துள்ளது.

இந்த வழக்கு, 2017ஆம் ஆண்டின் குழந்தைகளுக்கு எதிரான பாலியல் குற்றங்கள் சட்டத்தின் கீழ் விசாரிக்கப்பட்டு வருகிறது. குற்றம் நிரூபிக்கப்பட்டால், நீண்டகால சிறைத்தண்டனை, பிரம்படி தண்டனையும் விதிக்கப்படலாம்.

மேலதிக ஆவணங்கள் தாக்கல் செய்யப்படுவதற்காக, வழக்கு ஜூலை 6ஆம் தேதிக்கு ஒத்திவைக்கப்பட்டுள்ளது.

இந்த வழக்கு, பள்ளிகளில் மாணவர் பாதுகாப்பை மேலும் வலுப்படுத்த வேண்டிய அவசியத்தை மீண்டும் வெளிச்சமிட்டுக் காட்டியுள்ளது. குற்றச்சாட்டுகள் தொடர்பான விசாரணை தொடர்ந்து நடைபெற்று வரும் நிலையில், வழக்கின் அடுத்த கட்ட நடவடிக்கைகள் மீது பொதுமக்களின் கவனம் திரும்பியுள்ளது.

-சங்கீர்த்தனா