பணமோசடி வழக்கு என மிரட்டி நூதனக் கொள்ளையில் சிக்கிய இல்லத்தரசி

கோலா திரங்கானு: 

தொலைபேசி மோசடி கும்பலின் சூழ்ச்சியில் சிக்கி, தமது சேமிப்புப் பணம் மட்டுமல்லாமல், கடனையும் சுமக்க வேண்டிய நிலை இல்லத்தரசிக்கு ஏற்பட்டுள்ளது.

43 வயதுடைய பாதிக்கப்பட்ட பெண், நேற்று மதியம் 12.16 மணியளவில் கோலா திரங்கானு போலிஸ் நிலையத்தில் புகார் அளித்துள்ளதாக கோலா திரங்கானு மாவட்ட போலிஸ் தலைவர் அஸ்லி முஹம்மத் நூர் தெரிவித்துள்ளார்.

கடந்த ஆண்டு ஜூலை 13 ஆம் தேதி, பாதிக்கப்பட்டவர், காப்பீடு, போலிஸ் சார்பில் தான் பேசுவதாகக் கூறிய ஒரு நபரிடமிருந்து தொலைபேசி அழைப்பைப் பெற்றதாக அவர் கூறினார்.

அந்தக் கும்பல், தனது வங்கிக் கணக்கை உள்ளடக்கிய பணமோசடி வழக்கில் பாதிக்கப்பட்டவர் சிக்கியிருப்பதாகத் தெரிவித்ததாக அவர் தெரிவித்தார்.

"விசாரணை நோக்கங்களுக்காக, இரண்டு வங்கிக் கணக்குகளைத் திறக்குமாறும், அந்தத் தொடர்புடைய வங்கித் தகவல்களை அவர்களிடம் ஒப்படைக்குமாறும் பாதிக்கப்பட்டவரிடம் கேட்கப்பட்டது.

"தேசிய வங்கியின் விசாரணைக்காக, கும்பலால் வழங்கப்பட்ட வங்கி கணக்குகளுக்குப் பணம் செலுத்துமாறும் பாதிக்கப்பட்டவரிடம் கேட்கப்பட்டது" என்றார் அவர்.

பின்னர், பாதிக்கப்பட்டவர், பல வங்கி கணக்குகளுக்கு 749,000 ரிங்கிட் தொகையை மாற்றியதாக அஸ்லி கூறினார்.

ஆகஸ்ட் 2025 முதல் ஜனவரி 2026 வரையிலான காலப்பகுதியில், பாதிக்கப்பட்டவர், சேமிப்புப் பணம், வங்கிக் கடன்கள் மூலம் கிடைத்த பணத்தைப் பயன்படுத்தி செலுத்தியதாக அவர் தெரிவித்தார்.

 'Semak முள்' பயன்பாட்டின் மூலம் சரிபார்த்ததைத் தொடர்ந்தும், தன்னைத் தொடர்பு கொண்ட தொலைபேசி எண், ஒரு மோசடி செய்பவருக்குச் சொந்தமானது என்பதைக் கண்டறிந்ததைத் தொடர்ந்தும், தான் ஏமாற்றப்பட்டதை பாதிக்கப்பட்டவர் உணர்ந்ததாக அஸ்லி கூறினார்.

தண்டனைச் சட்டத்தின் பிரிவு 420-ன் கீழ் இந்த வழக்கு விசாரிக்கப்பட்டு வருகிறது என்றார் அவர்.

- சங்கீர்த்தனா