இயற்கையும் கலையும் கை கோர்க்கும் அதிசயம்: திறந்தவெளி கலை அரங்காக மாறும் லங்காவி

லங்காவி:

உலக சுற்றுலாப் பயணிகளைத் தனது கண்கவர் இயற்கை எழிலால் வசீகரித்துவரும் லங்காவி, இப்போது சமகாலக் கலையின் புதிய முகமாக உருவெடுத்து வருகிறது. 29வது 'Bakat Muda Sezaman (BMS29)' கலைக் கண்காட்சி, லங்காவி தீவை ஒரு பிரம்மாண்ட “திறந்தவெளி கலை கேன்வாஸாக” மாற்றியுள்ளது.

வழக்கமான கலை அரங்குகளைத் தாண்டி, பொதுமக்கள் அன்றாடம் பயன்படுத்தும் இடங்களிலேயே கலைப் படைப்புகள் காட்சிப்படுத்தப்படுவது இந்த நிகழ்வின் மிகப்பெரிய சிறப்பாகப் பார்க்கப்படுகிறது. குவா சந்தை, பழைய மருத்துவமனை, கடற்கரைப் பகுதிகள், நெல் வயல்கள், படகுத்துறைகள், பொழுதுபோக்கு பூங்காக்கள் என லங்காவியின் பல முக்கிய இடங்கள், தற்போது உயிர்ப்புடன் பேசும் கலை மேடைகளாக மாறியுள்ளன.

இந்தக் கண்காட்சியில் நிறுவல் கலை, டிஜிட்டல் கலை, கலப்பு ஊடகங்கள், நேரடி நிகழ்ச்சிகள், பொதுமக்களுடன் தொடர்பு கொள்ளும் ஊடாடும் கலைப் படைப்புகள் இடம்பெற்றுள்ளன.

இதன் மூலம், “கலை என்பது உயர்சாதி வட்டாரங்களுக்கான ஒன்றல்ல; மக்களின் வாழ்க்கையோடு கலந்த ஒரு சமூக மொழி” என்ற செய்தி வலுவாக முன்வைக்கப்படுகிறது.

தேசிய கலையரங்க நிர்வாகம், இளம் கலைஞர்கள் நேரடியாக மக்களிடமும் இயற்கை சூழல்களிடமும் சென்று அனுபவம் பெற வேண்டும் என்ற நோக்கில் இந்த முயற்சியை முன்னெடுத்துள்ளது.

குளிர்சாதன அறைகளில் உருவாவது மட்டும் கலை அல்ல, மக்களின் உண்மை வாழ்க்கையையும் உள்ளூர் அடையாளங்களையும் பிரதிபலிக்கும் கலையே இன்றைய காலத்தின் தேவை என வலியுறுத்தப்பட்டுள்ளது.

ஜப்பானின் புகழ்பெற்ற Echigo-Tsumari Art Triennale மாதிரியை முன்மாதிரியாகக் கொண்டு, லங்காவியிலும் “கலை சுற்றுலா” என்ற புதிய பரிமாணத்தை உருவாக்கும் முயற்சியாக இது பார்க்கப்படுகிறது.

மேலும், உள்ளூர் கலைஞர்கள், குடியிருப்பாளர்கள், லங்காவியின் கடற்கரை, மலைத்தொடர்கள், பாரம்பரிய கலாச்சார கூறுகள், பொதுக் கலையை வளர்க்கும் அரிய பொக்கிஷங்கள் எனக் கருத்து தெரிவிக்கின்றனர்.

சரியான திட்டமிடலுடன் முன்னெடுக்கப்பட்டால், லங்காவி உலக தரத்திலான திறந்தவெளி கலைத் தீவாக மாறும் திறன் கொண்டதாகவும் அவர்கள் நம்புகின்றனர்.

- சங்கீர்த்தனா