1எம்டிபி நிதியில் 74.5 சதவீதத்தை மீட்டெடுத்தது மலேசியா: உலக நாடுகளுக்கே முன்மாதிரியாகத் திகழும் எஸ்.பி.ஆர்.எம்

புத்ராஜெயா: 

1Malaysia Development Berhad (1எம்டிபி) நிறுவனத்திடமிருந்து தவறாகப் பயன்படுத்தப்பட்ட 42 பில்லியன் ரிங்கிட்டில், 31.3 பில்லியன் (74.5 சதவீதம்) மீட்டெடுக்கும் முயற்சியில் மலேசிய ஊழல் தடுப்பு ஆணையம் (எஸ்.பி.ஆர்.எம்) வெற்றி பெற்றுள்ளது. இது, பெரிய அளவிலான நிதி குற்ற ஊழலில், உலகின் மிக உயர்ந்த சொத்து மீட்பு விகிதங்களில் ஒன்றாகப் பதிவாகியுள்ளது.

மலேசிய ஊழல் தடுப்பு (எஸ்.பி.ஆர்.எம்) தலைமை ஆணையர் தான் ஸ்ரீ அஸாம் பாக்கி, அந்தத் தொகை, முன்னர் குறிப்பிடப்பட்ட மீட்புக் கணிப்பான 70 சதவீதத்தையும், சுமார் 30 பில்லியன் ரிங்கிட்டையும் மீறியுள்ளது.

"இதுவரை, தரவுகளின் அடிப்படையில், தவறாகப் பயன்படுத்தப்பட்ட மொத்த 1எம்டிபி நிதிகளின் அளவு 42 பில்லியன் ரிங்கிட் ஆகும். 2025 ஆம் ஆண்டு நிலவரப்படி, வெற்றிகரமாக மீட்கப்பட்ட சொத்துகளின் மொத்த மதிப்பு சுமார் 31.3 பில்லியன் ரிங்கிட்டாக பதிவாகியுள்ளது.

"இது, மொத்தம் தவறாகப் பயன்படுத்தப்பட்டதில் 74.5 சதவீதத்தைக் குறிக்கிறது. இந்த 1எம்டிபி சொத்து மீட்பு விகிதம் ஒரு பெரிய சாதனையாகக் கருதப்பட்டதோடு மேலும் சர்வதேச அங்கீகாரத்தைப் பெற்றுள்ளது.

1எம்டிபி ஊழலைத் தொடர்ந்து சொத்து மீட்புச் செயல்முறை 2019 இல் தொடங்கியதாகவும், அந்த ஆண்டில் 1.155 பில்லியன் ரிங்கிட் வெற்றிகரமாக மீட்கப்பட்டதாகவும், அதைத் தொடர்ந்து 2020 இல் 14.257 பில்லியன், 2021 இல் 5.117 பில்லியன் மீட்கப்பட்டதாகவும் அவர் கூறினார்.

"அதனைத் தொடர்ந்து, 2022 இல் 400.38 மில்லியன், 2023 இல் 8.088 பில்லியன், 2024 இல் R15.95 மில்லியன், 2025 இல் 1.566 பில்லியன் ரிங்கிட் மீட்கப்பட்டது" என்றார் அவர்.

நாட்டின் சொத்து மீட்பு முயற்சிகள், அமெரிக்காவின் ஃபெடரல் புலனாய்வுப் பணியகம், நீதித் துறை உள்ளிட்ட பல்வேறு தரப்பினருடனான சர்வதேச மூலோபாய ஒத்துழைப்பையும் சட்ட செயல்முறைகளையும் உள்ளடக்கியதாக அஸாம் கூறினார்.

ஒன்றிய சட்ட உதவி, நிதி உளவுப் பகிர்வு, இருபக்கப் பேச்சுவார்த்தைகள், அமெரிக்கா, சுவிட்சர்லாந்து, ஐக்கிய ராஜ்யம், சிங்கப்பூர் உள்ளிட்ட நாடுகளை உள்ளடக்கிய எல்லை தாண்டிய சொத்து பறிமுதல் நடவடிக்கைகள் போன்ற வழிமுறைகள் மூலமாகவும் இந்த முயற்சிகள் மேற்கொள்ளப்பட்டன.

"வெற்றிகரமாக மீட்கப்பட்ட முக்கிய சொத்துக்களில், எக்வானிமிட்டி என்ற ஆடம்பர படகின் விற்பனையிலிருந்து கிடைத்த சுமார் 543 மில்லியன் ரிங்கிட், கூடுதலாக ஒரு தனியார் ஜெட், வெளிநாட்டில் உள்ள ரியல் எஸ்டேட் ஆகியவற்றின் திரும்பப் பெறுதல் ஆகியன அடங்கும்" என்றார் அவர்.

கோல்ட்மேன் சாக்ஸ் குரூப் இன்க், சர்வதேச பெட்ரோலிய முதலீட்டு நிறுவனம், ஆபார் இன்வெஸ்ட்மென்ட்ஸ் பி.ஜே.எஸ், தணிக்கை நிறுவனங்களான டெலாய்ட் பி.எல்.டி, கே.பி.எம்.ஜி பி.எல்.டி போன்ற சர்வதேச நிதி நிறுவனங்களை உள்ளடக்கிய உலகளாவிய தீர்வையும் மலேசியா பெற முடிந்ததாக அஸாம் கூறினார். இவை அனைத்தும் நாட்டிற்கு பில்லியன் கணக்கான ரிங்கிட்டைப் பங்களித்துள்ளன.

"சுவிட்சர்லாந்தில், சுமார் EUR25.2 மில்லியன் (சுமார் 114 மில்லியன் ரிங்கிட்) மதிப்பில் விற்கப்பட்ட, கிளாட் மோனட்டின் 'வெத்துய் ஓ சோலெய்' என்ற ஓவியத்தின் விற்பனை வருமானத்தையும் எஸ்.பி.ஆர்.எம் தீவிரமாக மீட்க முயற்சித்து வருகிறது.

"அந்த நிதிகள், தற்போது அமெரிக்க அதிகாரிகளால் பறிமுதல் நடவடிக்கைகளுக்கு உட்படுத்தப்பட்டுள்ளன. மேலும், அமெரிக்கா, சுவிட்சர்லாந்தில் உள்ள அதிகாரிகளுடனான ஒத்துழைப்புடன், சட்டப்பூர்வ சேனல்கள் மூலம் அந்தப் பணத்தை மீட்கும் முயற்சிகள் தொடர்ந்து நடைபெற்று வருகின்றன" என்றார் அவர்.

இருப்பிடம் அல்லது கால அளவைப் பொருட்படுத்தாமல், தவறாகப் பயன்படுத்தப்பட்ட ஒவ்வொரு சொத்தையும் கண்டுபிடித்து மீட்பதில் எஸ்.பி.ஆர்.எம் தொடர்ந்து உறுதிபூண்டுள்ளது என்று அஸாம் கூறினார்.

"இன்ஷா அல்லாஹ், இவை அனைத்தும் எதிர்வரும் காலத்தில் நாட்டிடம் திரும்பப் பெறப்படும். இந்த முயற்சி, நாட்டின் சொத்துகளை மீட்பதற்கு மட்டுமல்ல, நமது நாட்டு நிறுவனங்களின் கண்ணியத்தையும், நம்பிக்கையையும் மீட்டெடுப்பதற்குமாகும்.

"எவரும் சட்ட நடவடிக்கையில் இருந்து தப்ப முடியாது, மேலும் மக்களின் ஒவ்வொரு சென்ட்டும் திரும்பப் பெறப்படுவது உறுதி செய்யப்படும்" என்றார் அவர்.

-சங்கீர்த்தனா