விளையாட்டு வினையானது: விமானத்தில் வெடிகுண்டு வதந்தி பரப்பிய பயணி கைது

பாங்காக்: 

கடந்த ஞாயிற்றுக்கிழமை, கிராபி சர்வதேச விமான நிலையத்திலிருந்து புறப்பட்ட தாய் ஏர்ஏசியா விமானத்தில் ஏற்பட்ட ஒரு போலி குண்டு மிரட்டல், நான்கு மணி நேர தாமதத்தை ஏற்படுத்தியுள்ளது உடனடி பாதுகாப்பு நடவடிக்கைகளை எடுக்க தாய்லாந்து அதிகாரிகளைத் தூண்டியுள்ளது. மேலும், குற்றவாளிகள் மீது கடுமையான சட்ட நடவடிக்கை எடுப்பதாகவும் அவர்கள் உறுதிப்படுத்தியுள்ளனர்.

உள்ளூர் நேரப்படி மாலை 4.47 மணியளவில், பாங்காக்கில் உள்ள சுவர்ணபூமி சர்வதேச விமான நிலையத்தை நோக்கிச் செல்லத் திட்டமிடப்பட்ட ஏர்பஸ் ஏ320 விமானமான, தாய் ஏர்ஏசியா AIQ 4401 விமானத்தில் இந்தச் சம்பவம் நிகழ்ந்துள்ளது.

விமானம் அதன் பார்க்கிங் இடத்திலிருந்து பின்னோக்கிச் சென்று கொண்டிருந்த போது, ஒரு பயணி, தனது கேபின் சாமான்களில் வெடிபொருட்கள் இருப்பதாகக் கூறியுள்ளார்.

பணியாளர்கள் அந்தக் கூற்றை விமானிக்குத் தெரிவித்தனர். அவர் உடனடியாகப் புறப்படும் நடைமுறையை நிறுத்தி, விமானத்தை புறப்படும் வாயிலுக்குத் திருப்பினார்.

அந்தப் பயணி பின்னர் அந்தக் கூற்றை ஒரு "கிண்டல்" என்று ஒப்புக்கொண்ட போதிலும், நிலையான பாதுகாப்பு நடைமுறைகள் தாமதமின்றி செயல்படுத்தப்பட்டன.

அனைத்துப் பயணிகளும் வெளியேற்றப்பட்டு மேலும் அனைத்து சாமான்களும் இறக்கப்பட்டன.

பின்னர், முக்கிய முனையத்திலிருந்து வெகு தொலைவில், முழுமையான சோதனையை மேற்கொள்ள பாதுகாப்புக் குழுவினருக்கு வசதியாக, அந்த விமானம் அவசரகாலங்களுக்காக ஒதுக்கப்பட்ட ஒரு தனிமைப்படுத்தப்பட்ட பகுதிக்கு நகர்த்தப்பட்டது.

விமான நிலையத் துறை, வழக்கமான அட்டவணையின் படி, மற்ற விமானங்கள் வந்து செல்வதுடன், விமான நிலைய செயல்பாடுகள் வழக்கம் போல் நடைபெறுவதை உறுதிப்படுத்தியது.

மாலை 8 மணியளவில், பாதுகாப்புக் குழுவினர் தங்கள் ஆய்வுகளை முடித்தனர், மேலும் எந்த வெடிபொருட்கள் அல்லது சந்தேகத்திற்கிடமான பொருட்களையும் கண்டுபிடிக்கவில்லை. அந்த விமானம் இறுதியாக இரவு 9 மணிக்குப் புறப்பட்டது. இது சுமார் 4 மணி 15 நிமிட தாமதத்தை ஏற்படுத்தியது.

சம்பவத்திற்குப் பின்னர் போலியான கூற்றைப் பரப்பி அனைவரையும் பீதியடையச்  செய்த அந்நபரை அதிகாரிகள் உடனடியாகக் கைது செய்தனர்.

போக்குவரத்து துணை அமைச்சர் பாட்ராபோங் பாட்ராப்ரசித், ஒரு விரிவான பின்தொடர் விசாரணைக்கு உத்தரவிட்டார். அதே நேரத்தில், நோக்கம் எதுவாக இருந்தாலும், பொதுப் பீதியைத் தூண்டும் எந்தவொரு கூற்றும் சட்டத்தின் கீழ் முழுமையாக விசாரிக்கப்படும் என்று வலியுறுத்தினார்.

தாய்லாந்தின் விமானப் போக்குவரத்துத் துறையில் இது ஒரு தனித்த சம்பவம் அல்ல. செப்டம்பர் 2025 இல், மும்பையில் இருந்து புகெட்டிற்குச் சென்ற இண்டிகோ விமானம் ஒன்று, போலி குண்டு மிரட்டலைத் தொடர்ந்து திசை திருப்பப்பட்டது குறிப்பிடத்தக்கது.

பொது இடங்களில் பயம் விதைப்பது விளையாட்டு அல்ல. இத்தகைய செயலில் ஈடுபடுபவர்களுக்கு கடுமையான தண்டனை அவசியம் கொடுக்கப்பட வேண்டும்.

-சங்கீர்த்தனா