அரசியல் விமர்சனங்களுக்கு அஞ்சமாட்டோம்: பினாங்கிற்கு 60% வளர்ச்சியை உறுதி செய்தது மடானி அரசு

பத்து காவான்: 

மடானி நிர்வாகத்தின் கீழ் பினாங்கில் கூட்டரசு அரசாங்கத்தின் மேம்பாட்டுச் செலவினங்கள் சுமார் 60 சதவீதம் அதிகரித்துள்ளது. இது தேசிய மேம்பாட்டிற்கான மிகவும் சமநிலையான அணுகுமுறையைப் பிரதிபலிப்பதாக அரசாங்கம் தெரிவித்துள்ளது.

2021, 2022 ஆம் ஆண்டுகளில் 5 பில்லியன் ரிங்கிட்டுக்கும் குறைவாக இருந்த மாநிலத்திற்கான ஒதுக்கீடுகள், அடுத்த ஆண்டுகளில் அதிகரிக்கப்பட்டதாக பிரதமர் டத்தோஸ்ரீ அன்வர் இப்ராஹிம் சுட்டிக் காட்டினார்.

"2021, 2022 ஆம் ஆண்டுகளில், பினாங்கிற்கான கூட்டரசு செலவினங்கள் 5 பில்லியனை எட்டவில்லை. மடானி அரசாங்கத்தின் கீழ் நியாயமானதை நாங்கள் மீட்டெடுக்கிறோம்" என்று அவர் கூறினார்.

இன்று இங்கு நடைபெற்ற சாலைப் போக்குவரத்துத் துறையின் 80-ஆவது ஆண்டு விழாவில் பேசிய அன்வர், 2023 ஆம் ஆண்டில் பினாங்கிற்கான ஒதுக்கீடுகள் 5.7 பில்லியனாகவும், 2024 ஆம் ஆண்டில் 5.8 பில்லியனாகவும், 2025 ஆம் ஆண்டில் 7.6 பில்லியனாக உயர்ந்ததாகவும், இந்த ஆண்டு 7.8 பில்லியன் ரிங்கிட் ஒதுக்கப்பட்டுள்ளதாகவும் தெரிவித்தார்.

"2022 உடன் ஒப்பிடும்போது சுமார் 60 சதவீதம் அதிகரித்துள்ளது," என்றார் அவர்.

அதிகரித்த செலவினங்கள், சமீபத்தில் அறிவிக்கப்பட்ட முத்தியாரா வரையிலான எல்.ஆர்.டி திட்டம், ஜுரு, சுங்கை துவா கட்டணச் சாவடிக்கு இடையிலான நெடுஞ்சாலை மேம்பாடுகள் உள்ளிட்ட முக்கிய உள்கட்டமைப்புத் திட்டங்களை உள்ளடக்கியதாக அன்வர் கூறினார்.

எல்.ஆர்.டி திட்டம், குறிப்பாக அதன் செலவு குறித்து, பாராளுமன்றத்தில் அரசியல் விமர்சனங்களை ஈர்த்துள்ளதாகவும், ஆனால் நீண்டகால மேம்பாட்டிற்கான முடிவு அவசியமானது என்றும் அவர் குறிப்பிட்டார்.

"எல்.ஆர்.டி தீவுக்குள் இருக்க வேண்டும் என்பதாக இருந்தது. மேம்பாட்டின் தேவைகளை நான் மிகவும் பரந்த அளவில் புரிந்துகொள்கிறேன். எனவே, அதை முக்கிய நிலப்பகுதிக்கு நீட்டிக்குமாறு முன்மொழிந்தேன்" என்றார் அவர்.

தன்னை ஒரு "அனக் செபெராங்" என்று விவரித்துக் கொண்ட அன்வர், விரிவாக்கத் திட்டங்கள் செலவுகளைத் தவிர்க்க முடியாமல் அதிகரித்ததாகக் கூறினார்.

கிளாந்தான், திரங்கானு உள்ளிட்ட பிற மாநிலங்களிலும் மேம்பாட்டுச் செலவினங்களில் இதே போன்ற அதிகரிப்புகள் காணப்பட்டன என்றும், எந்தப் பிராந்தியத்தையும் அரசாங்கம் புறக்கணிக்கவில்லை என்றும் அவர் மேலும் தெரிவித்தார்.

"தேசிய வருவாயும் அதிகரித்துள்ளதால், அனைத்து மாநிலங்களுக்கும் ஒதுக்கீடுகளை நாங்கள் அதிகரித்து வருகிறோம்" என்றார் அவர்.

முந்தைய ஏற்றத்தாழ்வுகளிலிருந்து விடுபட்டு, மாநிலங்கள் முழுவதும் மேலும் சமமான மேம்பாட்டை உறுதி செய்வதே மடானி நிர்வாகத்தின் அணுகுமுறை என்று அன்வர் குறிப்பிட்டார்.

மேம்பாட்டுத் திட்டங்கள் திறமையாகச் செயல்படுத்தப்படுவதோடு, மக்களுக்கு உறுதியான நன்மைகளை வழங்குவதிலும் அரசாங்கம் உறுதிபூண்டுள்ளது என்று அவர் கூறினார்.

-சங்கீர்த்தனா