உலகளாவிய பிளாஸ்டிக் தட்டுப்பாடு: மாற்று ஆதாரங்களைத் தேடுகிறது மலேசிய அரசாங்கம்

கோலாலம்பூர்:

எண்ணெய், எரிவாயு உற்பத்தியில் ஏற்பட்டுள்ள இடையூறு, ஹோர்முஸ் நீரிணையில் நிலவும் நிச்சயமற்ற தன்மை காரணமாக, உலகளாவிய பிளாஸ்டிக் விநியோகம் தற்போது பாதிக்கப்பட்டுள்ளது என்று துணைப் பிரதமர் டத்தோ ஸ்ரீ ஃபாடில்லா யூசோஃப் கூறியுள்ளார்.

எரிசக்தி மாற்றம், நீர் உருமாற்ற அமைச்சருமான ஃபாடில்லா, பிளாஸ்டிக் உற்பத்தி செயல்முறையானது, எண்ணெய், எரிவாயுவில் இருந்து உற்பத்தி செய்யப்படும் நாஃப்தா, அம்மோனியா, எத்திலீன், புரோப்பிலீன் போன்ற மூலப்பொருட்களைச் சார்ந்துள்ளது என்று தெரிவித்தார்.

"உணவு பேக்கேஜிங், நுகர்வோர் பொருட்கள், சுகாதார உபகரணங்கள் என நமது அன்றாட வாழ்வில் பிளாஸ்டிக் ஒரு அடிப்படை அங்கமாக விளங்குகிறது" என்று இன்று உள்ளூர் தொலைக்காட்சியில் நேரடியாக ஒளிபரப்பப்பட்ட உலகளாவிய விநியோக நெருக்கடி குறித்த விளக்கக் கூட்டத்தில் அவர் இவ்வாறு கூறினார்.

எனவே, கூடுதல் ஆதாரங்களைப் பெறுவதற்கும், சர்வதேச ஒத்துழைப்பை விரிவுபடுத்துவதற்கும், விநியோகச் சங்கிலியின் தொடர்ச்சியை உறுதி செய்வதற்கும் மாற்று மூலப்பொருட்களை ஆராய்வதற்கும் அரசாங்கம் தனது முயற்சிகளை தீவிரப்படுத்தி வருவதாக அவர் தெரிவித்தார்.

"இதுவரை, உள்நாட்டு விநியோகம் குறைந்தபட்சம் இரண்டு மாதங்களுக்கு இன்னும் போதுமானதாக உள்ளது" என்றார் அவர்.

மேலும், உணவு பேக்கேஜிங், நுகர்வோர் பொருட்கள், சுகாதார உபகரணங்கள், தளவாடங்கள் உள்ளிட்ட பல்வேறு பொருளாதாரத் துறைகளில் பிளாஸ்டிக் ஒரு முக்கிய அங்கமாக இருப்பதாக அவர் கூறினார்.

"எண்ணெய், எரிவாயு அடிப்படையிலான பொருட்கள் அன்றாட வாழ்க்கையில் பரவலாகப் பயன்படுத்தப்படுகின்றன. உலகளாவிய விநியோகத்தில் இடையூறு ஏற்படும் போது, உற்பத்தி குறைவாக இருக்கும், மேலும் செலவுகள் உயரும் என எதிர்பார்க்கப்படுகிறது" என்றார் அவர்.

இதற்கிடையில், சுகாதாரத் துறையின் தேவைகளை ஆதரிப்பதற்காக, சீனாவிடமிருந்து கூடுதல் நாஃப்தா, ரெசின் விநியோகத்தை சுகாதார அமைச்சு பெற்றுள்ளதாக ஃபாடில்லா குறிப்பிட்டார்.

தொடர்ந்து, கருத்து தெரிவித்த அவர், உலகளாவிய விநியோகச் சங்கிலி அழுத்தங்களின் விளைவுகளைத் தனியாகச் சுமக்க அரசாங்கம் மக்களை அனுமதிக்காது என்று வலியுறுத்தினார்.

"மக்களின் அன்றாடத் தேவைகளுக்கான விநியோகம் தொடர்ந்து பாதுகாப்பாக இருப்பதை அரசாங்கம் உறுதி செய்யும்" என்றார் அவர்.

அத்தியாவசிய விநியோகங்கள் போதுமானதாக இருப்பதை உறுதி செய்தல், நியாயமான மேலாண்மை, விநியோகம் மூலம் விநியோக காலத்தை நீட்டித்தல், உன்னிப்பான கண்காணிப்பு, கடுமையான நடவடிக்கைகள் மூலம் விலை உயர்வைக் கட்டுப்படுத்துதல் ஆகிய மூன்று முக்கிய உத்திகளில் கவனம் செலுத்தி, மக்கள் பாதுகாக்கப்படுவதை உறுதி செய்வதற்கான முயற்சிகளை அரசாங்கம் தொடர்ந்து வலுப்படுத்தும் என்று ஃபாடில்லா கூறினார்.

இதற்கு முன்னர், மேற்கு ஆசிய நெருக்கடியைத் தொடர்ந்து, குறுகிய முதல் நடுத்தர காலத்தில் நாட்டின் பிளாஸ்டிக் உற்பத்தித் தொழில் தொடர்ந்து நிச்சயமற்ற தன்மையை எதிர்கொள்ளும் என்று எதிர்பார்க்கப்படுவதாகத் தெரிவிக்கப்பட்டுள்ளது.

மேலும், பல ரெசின் தரங்கள் ஒரு டன்னுக்கு US$2,000-ஐத் தாண்டியதாகக் கூறப்படுகிறது. ஹோர்முஸ் நீரிணை வழியாக கச்சா எண்ணெய், பெட்ரோ ரசாயணப் பொருட்களின் ஓட்டத்தை மோதல் சீர்குலைத்ததில், இது 100 சதவீதத்திற்கும் அதிகமாக உயர்ந்துள்ளது. இது ரெசின் உற்பத்திக்கான முன்னோக்கி விநியோகத்தை பாதித்துள்ளது.

-சங்கீர்த்தனா